Toshkentdagi ilk xususiy futbol maktabi jamoasi meksikalik raqiblarini mag'lub etdi
/ Kiritdi: BestMaster Ko'rilgan: 961
Toshkentda ilk tashkil etilgan xususiy futbol maktablaridan bo'lgan JFL in Taschkent va uning Qo'qondagi filiali JFL in Kokand'ning 12 yoshlilar jamoasi Kataloniyadagi MIC-2019 musobaqasidagi ishtirokini g'alaba bilan boshladi.
Musobaqadagi ilk uchrashuv Meksikaning "Kankun" jamoasiga qarshi kechdi. Uchrashuvning ilk daqiqalaridayoq kutilmaganda uzoqdan yo'llangan zarba evaziga meksikaliklar hisobni ochishdi. Ammo hamyurtlarimiz irodali va chiroyli o'yin evaziga 2:1 hisobida g'alaba qozonishning uddasidan chiqishdi.
Eslatib o'tamiz, bolalar o'rtasidagi norasmiy jahon chempionati sifatida tanilgan MIC-2019 musobaqasida "Barselona", "Real", "Espanol" va "Tottenxem" kabi klublar bor. JFL in Taschkent jamoasi guruhda yana Ispaniyaning "Rasing Sarria" va "Salle Jirona" jamoalariga qarshi maydonga tushadi.