Engil atletikachilarimiz Qatarda o'tkazilayotgan Osiyo chempionatida ishtirok etishadi

21-24 aprel kunlari Qatar poytaxti Doxa shahrida engil atletika bo'yicha Osiyo chempionati bo'lib o'tadi. 23-marotaba tashkil etilayotgan qit'a birinchiligida O'zbekiston milliy terma jamoasi ham ishtirok etadi. 

Shuningdek, chempionat doirasida Osiyo engil atletika federatsiyalari assotsiatsiyasining navbatdagi Kongressi o'tkaziladi. Unda O'zbekiston jismoniy tarbiya va sport vazirligi boshqarma boshlig'i Nizomjon To'xtaboev, O'zbekiston engil atletika federatsiyasi prezidenti Andrey Abduvaliev va federatsiya bosh kotibi Kamolliddin Ro'zimuxammedov ham ishtirok etadi. 

Jamoamiz 6 apreldan Turkiyaning Antaliya shahrida navbatdagi o'quv-yig'in mashg'ulotida ushbu chempionatga va 2020 yil Tokio shahrida bo'lib o'tadigan XXXII yozgi Olimpiya o'yinlari tayyorgarlik ko'rayotgan edi. 

Doxadagi “Xalifa” stadionida o'tkaziladigan chempionatda musobaqa tashkilotchilari xabariga ko'ra 44 davlatdan tashrif buyurgan sportchilar 186 ta medallar jamlanmasi uchun bahs olib boradi. 

Osiyo chempionatida Nadiya Dusanova, Svetlana Radzivil, Nigina Sharipova, Roksana Xudoyorova, Ekaterina Voronina, Aleksandra Yurkevskaya, Sanobar Erkinova, Ivan Markelov, Alina Yablokova, Marat Haydarov, Suhrob Xodjaev, Ivan Denisov, Sergey Dementev va Nikita Loginov mamlakatimiz sharafini himoya qiladi.