Toshkentda o'tadigan badiiy gimnastika bo'yicha jahon kubogi bosqichining taqvimi qanday?

Xabaringiz bor, 19-21 aprel kunlari Toshkent yana bir bor badiiy gimnastika bo'yicha jahon kubogi bosqichlaridan biriga mezbonlik qiladi.

Ushbu bosqich Tokio Olimpiadasiga litsenzion ochkolar taqdim etishi bilan yanada ahamiyatli. O'zbekiston gimnastika federatsiyasining ma'lum qilishicha, ayni paytga kelib 23 davlat vakillari musobaqada ishtirok etish uchun ro'yxatdan o'tishgan. Sportchilarning umumiy soni 73 nafarni tashkil etib, ularning 39 nafari yakkalik bahslarida qatnashishadi.

Mezbonligimiz ostida kechadigan musobaqada Sabina Toshkenboeva hamda Ekaterina Fetisova yakkalik bahslarida yurtimiz sharafini himoya qilishadi. Guruh bellashuvlarida qatnashadigan gimnastikachilarimiz rossiyalik murabbiy qo'l ostida hozirlik ko'rishmoqda. Unda Nilufar Shomurodova, Dinara Ravshanbekova, Sofiyabonu Qosimova, Kamola Irnazarova, Kseniya Aleksandrova, Sevara Safoeva bahslarga kirishadi. Ayni paytda yurtdoshlarimiz jahon kubogiga tayyorgarlikning so'nggi bosqichini olib borishmoqda.

Turnir 19 aprel kuni start oladi. Tantanali ochilish marosimi 19:30 ga belgilangan. 20 aprel kuni soat 13:30 dan ko'pkurash bo'yicha yakkalik va jamoaviy bellashuvlar boshlanadi. 19:30 da taqdirlash marosimi bo'lib o'tishi rejalashtirilgan. 21 aprel kuni esa har bir element bo'yicha g'olib va sovrindorlar nomi aniqlab olinadi. 16:00 da musobaqaning tantanali yopilish marosimi boshlanadi.