O'FAda jiddiy yig'ilish bo'lib o'tdi

O'zbekiston futbol assotsiatsiyasida mamlakatimizda faoliyat yuritayotgan klublar qoshidagi futbol akademiyalar va xususiy futbol maktablari vakillari ishtirokidagi yig'ilish bo'lib o'tdi.   Yig'ilish davomida avvalo mamlakatimizda faoliyat yuritayotgan har bir futbol maktabi yoki to'garagi qonuniy tarzda ish olib borishi lozimligi ta'kidlandi. Shuningdek, ushbu futbol maktablari va to'garaklarida faqat O'FA tomonidan litsenziyadan o'tkazilgan murabbiylar ishlashi shartligi ham qayd etib o'tildi.    Shuningdek, akademiyalar va futbol maktablari tarbiyalanuvchilarini xorijiy mamlakatlarda tashkil etilayotgan turli musobaqalarga olib borish tartibi ishtirokchilarga tushuntirib o'tildi. Unga ko'ra xorijiy mamlakatdagi xalqaro musobaqaga  jo'nab ketishdan kamida 30 kun oldin klublar qoshidagi akademiyalar va xususiy futbol maktablari rahbariyati O'FA Futbol faoliyatini nazorat qilish boshqarmasini ogohlantirishlari zarurligi ta'kidlandi.  Bundan asosiy maqsad xorijga chiquvchi jamoalar mutasaddilarining mas'uliyatini oshirish, bolalarning xavfsizligini ta'minlashdan iborat.   O'FA Futbol faoliyatini nazorat qilish boshqarmasi tomonidan klublar qoshidagi futbol akademiyalar va xususiy futbol maktablari faoliyati tegishli tartibda o'rganib, yig'ilishda ko'tarilgan masalalarning ijrosi nazorat qilib boriladi. Qoidabuzarlikka yo'l qo'yganlarga nisbatan tegishli tartibda choralar ko'riladi.