EChL. «Liverpul» ishonchli g'alabani qo'lga kiritdi (videosharh)

Evropa chempionlar ligasining chorak final bosqichi doirasida dastlabki o'yinlar bo'lib o'tdi. Qur'ada omadi chopgan "Liverpul" dastlabki o'yinda ishonchli g'alabani qo'lga kiritdi.

Mersisaydliklar uchrashuvning 5-daqiqasidayoq "Portu" darvozasini ishg'ol qilishdi: Nabi Keyta jarima maydonchasi tashqarisidan yo'llangan zarba rikoshet orqali golga aylandi.

Birinchi bo'lim o'rtalarida Muhammad Saloh raqib darvozaboni bilan yakkama-yakka vaziyatga chiqib, imkoniyatdan foydalana olmadi. Oradan ko'p o'tmasdan esa Roberto Firmino chiroyli kombinatsiyadan unumli foydalanib, hisobdagi farqni 2taga oshirdi.

Tanaffusga qadar hisob yana o'zgarishi mumkin edi. Portugaliyaliklar hujumchisi Marega ikkita qulay imkoniyatdan foydalana olmagan bo'lsa, bir marta Firmino qulay vaziyatni ko'kka sovurdi.

Ikkinchi bo'limda "Liverpul" to'p nazoratini o'zida ushlab qolgan bo'lsa, mehmonlar ko'proq himoyalanishdi.

Shu tariqa, Yurgen Klopp shogirdlari javob o'yini oldidan ajoyib imkoniyatga ega bo'lishdi. Javob bahsi 17 aprel kuni Portugaliyada bo'lib o'tadi.

Evropa chempionlar ligasi, chorak final, dastlabki o'yin
Liverpul Angliya – Portu Portugaliya 2:0 (2:0, 0:0)
Gollar: 1:0 – 5 Keyta, 2:0 – 26 Firmino.
Liverpul – Alisson, Aleksander-Arnold, Lovren, van Deyk, Milner, Xenderson, Fabino, Keyta, Saloh, Firmino (Starridj, 82), Mane (Origi, 73).
Portu – Kasilyas, Maksi Pereyra (Fernando, 77), Felipe, Eder Militao, Korona, Danilu Pereyra, Oliver Torres (Brunu Koshta, 73), Telles, Otavio, Soares (Braimi, 62), Marega.
Ogohlantirishlar: Soares (17), Felipe (61).