EChL. «Manchester Siti» «Tottenxem»ga yutqazdi (videosharh)

Evropa chempionlar ligasining chorak final bosqichi doirasida dastlabki o'yinlar bo'lib o'tdi. Ko'pchilik uchun kutilmaganda «Tottenxem» o'z uyida «Manchester Siti»ni mag'lub etdi.

Gvardiola mazkur o'yin uchun pragmatik o'yin uslubini tanladi. Jamoa avvalo o'z darvozasidan to'p o'tkazib yubormaslikni o'yladi. Ular bu oqshom g'alaba qozonishlari mumkin edi. Ammo bahsning 13-daqiqasida VAR yordamida belgilangan penaltini Serxio Aguero golga aylantira olmadi. Uning zarbasini Ugo Loris qaytarishga muvaffaq bo'ldi.

Tanaffusga qadar muxlislar boshqa xavfli vaziyatlarga guvoh bo'lishmadi. Ikkinchi bo'limda esa "shporlar" tavakkal qilib oldinga tashlanishdi va buning uchun mukofotlanishdi. Uchrashuvning 78-daqiqasida Son Xyong Min "shaharliklar" darvozasini ishg'ol qilishga muvaffaq bo'ldi.

Shu tariqa, Pochettino shogirdlari javob o'yini oldidan ajoyib imkoniyatga ega bo'lishdi. Javob bahsi 17 aprel kuni Manchester shahrida bo'lib o'tadi.

Evropa chempionlar ligasi, chorak final, dastlabki o'yin
Tottenxem Angliya – Manchester Siti Angliya 1:0 (0:0, 1:0)
Gol: 1:0 – 78 Son Xyong Min.
Tottenxem – Loris, Tripper, Alderveyreld, Vertongen, Rouz, Sissoko, Uinks (Vanyama, 81), Eriksen, Alli (Lorente, 87), Son Xyong Min, Keyn (Lukas Moura, 58).
Manchester Siti – Ederson, Uoker, Otamendi, Laport, Delf, Fernandino, Gyundogan, Marez (Sane, 89), Silva (de Bryuyne, 89), Sterling, Aguero (Gabriel Jezus, 71).
Ogohlantirishlar: Rouz (12), Laport (28), Marez (59).
Amalga oshirilmagan penalti: Serxio Aguero (13, davrozabon)