Ot sporti. Tokio Olimpiadasi uchun litsenzion musobaqa Moskvada o'tkaziladi. Bu biz uchun ajoyib yangilik!

Sir emaski, ot sporti bo'yicha Olimpiya o'yinlarida ishtirok etgan delegatsiya qatnashuvchilar orasida alohida hurmat-e'tiborga loyiq bo'ladi, qudratli sport mamlakati sifatida qayd etiladi.

Chunki, sportning ushbu turida nafaqat chavandozlar, balki otlarga ham alohida e'tibor qaratish lozimdir. Bungacha O'zbekiston ot sporti bo'yicha Olimpiya o'yinlarida ishtirok etmagan. 2018 yilgi Osiyo o'yinlariga kelibgina biz ilk marotaba o'z otlarimiz bilan musobaqada ishtirok etdik.

1991 yildan so'ng ot sporti bo'yicha Olimpiya o'yinlariga litsenziya taqdim etuvchi musobaqalar asosan G'arbiy Evropa mamlakatlarida tashkil etilardi. Bu esa Markaziy Osiyo mamlakatlari, jumladan O'zbekiston uchun ham Olimpiada litsenziyasini qo'lga kiritish imkoniyatlarini sezilarli ravishda pasaytirib yuborardi. Chunki, veterinariya talablariga ko'ra otlar Evropa mamlakatlarida 90 kun karantinda bo'lishi lozim. Buning natijasida otlar bilan mashg'ulot o'tkazish imkoniyati kamayadi. Qolaversa, bu katta harajatlarni talab etadi.

Kuni kecha Xalqaro ot sporti federatsiyasining yig'ilishida Tokio Olimpiadasiga litsenzion musobaqalardan biri Moskva shahrida o'tkazilishi haqida qaror qabul qilindi. Bu bizga nima beradi? Yuqorida qayd etilganidek, G'arbiy Evropa mamlakatlaridan farqli ravishda biz otlar bilan birgalikda Moskva shahriga tezroq etib boramiz. Shuningdek, otlar uchun 90 kunlik karantin belgilanmagan. Bundan tashqari til, viza bilan bog'liq muammolar ham biz uchun boshog'riq bo'lmaydi, Evropaga otlar bilan borish uchun sarflanadigan harajatlar ham qisqaradi. Biz sanab o'tgan «plyus» tomonlar sportchilarimizning litsenziya olish uchun imkoniyatlarini sezilarli ravishda oshiradi.

Qayd etish lozimki, litsenzion musobaqani nisbatan yaqin bo'lgan Moskva shahrida o'tkazish uchun Rossiya, O'zbekiston va Qirg'iziston ot sporti federatsiyalari hamjihatlikda ish olib borishdi (Chunki, Markaziy Osiyoda ot sporti bo'yicha bunday litsenzion musobaqani o'tkazish uchun jahon standartlari talablariga javob beradigan inshoot mavjud emas. Eng yaqini Moskva shahrida joylashgan). Qolaversa, O'zbekiston Milliy olimpiya qo'mitasi tomonidan bu borada Xalqaro ot sporti federatsiyasiga murojaatnomalar yuborildi. Bu esa o'z samarasini berdi va Moskva shahri Tokio Olimpiadasiga yo'llanma beruvchi musobaqaga mezbonlik qilish huquqini qo'lga kiritdi.

Umid qilamizki, 2019 yilning 27-31 iyul kunlari Rossiya Federatsiyasi poytaxtida o'tkaziladigan musobaqada o'zbek chavandozlari tarixda ilk marotaba Olimpiya o'yinlari litsenziyasini qo'lga kiritadilar. Milliy olimpiya qo'mitasi bu yo'lda O'zbekiston yilqichilik va ot sporti federatsiyasiga muvaffaqiyatlar tilab qoladi.