O'zbekistonning 2018 yildagi eng yaxshi futbolchisi va murabbiyi uchun ovoz bering

2018 yil ham yakuniga etib qoldi. Bu yil o'zbek futbolida juda ko'p o'zgarishlar, islohotlar amalga oshirildi, katta yutuqlar qo'lga kiritildi.   Jumladan, yil boshida Ravshan Haydarov boshchiligidagi O'zbekiston U-23 terma jamoasi Osiyo chempionatida g'alaba qozonib, tarixdan joy oldi. Shuningdek, yozda Indozeniyada bo'lib o'tgan Osiyo o'yinlari ushbu jamoa chiroyli o'yin namoyish qilib, muxlislar e'tirofiga sazovor bo'ldi. O'sha musobaqada faqatgina omadsizlik tufayli terma jamoamiz keyinchalik chempionga aylangan Janubiy Koreyaga mag'lub bo'lgandi.    Bundan tashqari, muxlislarga va'da qilinganidek milliy terma jamoamizga xorijdan yangi bosh murabbiy tayinlandi. O'zbekiston terma jamoasi mazkur murabbiy qo'lostida bir qator o'rtoqlik o'yinlarida maydonga tushdi. Ayni paytda esa Turkiyada Osiyo Kubogi musobaqasiga tayyorgarlik olib bormoqda.   Yanvardagi  U-23 Osiyo chempionati bir qator yosh futbolchilarni muxlislarga kashf qilib berdi. Ushbu futbolchilar keyinchalik milliy terma jamoamizning yangi bosh murabbiy Ektor Kuperning ham e'tiboriga tushishdi va milliy terma jamoadan taklif olishdi. Terma jamoa tarkibida Odil Ahmedov, Marat Bikmaev, Anzur Ismoilov kabi tajribali futbolchilar bilan bir qatorda, Ikrom Aliboev, Javohir Sidiqov, Aziz G'aniev kabi futbolchilar o'zlarini ko'rsata boshlashdi.   Shuningdek, turli yoshdagi erkaklar va ayollar terma jamoalarimiz ham ushbu mavsumda bir qator xalqaro musobaqalarda muvaffaqiyatli qatnashishdi. Jumladan, Ravshan Haydarov boshchiligidagi O'zbekiston olimpiya terma jamoasi noyabr oyida "Dubai Cup" musobaqasida g'olib chiqdi. Karima Yo'ldosheva boshchiligidagi O'zbekiston U-19 ayollar terma jamoasi oktyabr oyida Bishkekda bo'lib o'tgan Osiyo chempionati saralashining 1-bosqichida guruhda 1-o'rinni egalladi. Bahrom Norsafarov boshchiligidagi O'zbekiston ayollar terma jamoasi noyabr oyidagi "CAFA championship" musobaqasida tengsiz deb topildi.    Yil yakunlanar ekan, 2018 yilning eng yaxshi futbolchisi va eng yaxshi murabbiyini aniqlash vaqti kelganini e'lon qilmoqchimiz. Demak, O'FA tomonidan o'tkaziladigan so'rovnomada O'zbekistonda va xorijda to'p surayotgan, faoliyat yuritayotgan o'zbekistonlik futbolchi va murabbiylar ishtirok etishlari mumkin. Barcha OAV xodimlari, shuningdek, muxlislarni so'rovnomada faol bo'lishga chaqiramiz! Har bitta OAV tahririyati bitta ovozga ega, muxlislarning ovozi ham jamlanib, bitta ovoz sifatida qabul qilinadi.     2018 yilning eng yaxshi futbolchisi kim bo'lishi kerak? O'z nomzodlaringizni birinchi, ikkinchi va uchinchi o'rinlarga joylashtirgan holda, [email protected] elektron manziliga yuborishingiz mumkin.    Masalan, O'zbekistonning 2018 yildagi eng yaxshi futbolchisi:   1. 2. 3.   O'zbekistonning 2018 yildagi eng yaxshi murabbiyi:   1. 2. 3.   Eng ko'p ovoz to'plagan futbolchi va murabbiy yil yakunida O'FA tomonidan taqdirlanadi.