Maynuning «Manchester Yunayted»dagi maoshi 650 foizga ko'tariladi

«Manchester Yunayted» yarim himoyachisi Kobbi Maynu tez orada klub bilan amaldagi shartnomasini uzaytiradi. Tomonlar 2031 yilning yoziga qadar mo'ljallangan kelishuv bo'yicha yakuniy xulosaga kelishgan.

Daily Mail nashrining xabar berishicha, yangi shartnomaga ko'ra 21 yoshli futbolchining maoshi naq 650 foizga oshadi. Agar hozirgacha Maynu haftasiga 20 ming funt maosh olib kelgan bo'lsa, yangi kelishuvdan so'ng bu ko'rsatkich haftasiga 150 ming funtni (taxminan 173 ming evro) tashkil etadi.

Yaqindagina 21 yoshini qarshi olgan Kobbi Maynu «qizil iblislar»ning asosiy tarkibida mustahkam o'rin egallashga ulgurdi. U hozirga qadar jamoa safida barcha musobaqalarda 98 ta uchrashuv o'tkazib, 7 ta gol va 5 ta golli uzatmaga mualliflik qilgan.