Lempardning «Chelsi»ga ehtimoliy qaytishi haqida yangi tafsilotlar

Hozirda «Koventri» jamoasini boshqarayotgan Frenk Lempard va uning sobiq klubi «Chelsi» o'rtasidagi yaqin aloqalar hali ham saqlanib qolmoqda. Bu haqda Sky Sports bosh muxbiri Kavex Solxekol ma'lum qildi.

Insayderning so'zlariga ko'ra, Lempardning nafaqat ko'ngli, balki kundalik hayoti ham hamon London klubi bilan bog'liq.

«Frenk Lempard hali ham «Stemford Bridj» stadioniga juda yaqin hududda yashaydi. Uning oilaviy hovlisi aynan o'sha erda joylashgan. Frenk bo'sh vaqt topildi deguncha, «Chelsi» o'yinlariga tashrif buyuradi. Men uni bir necha bor stadiondagi klub egalari uchun mo'ljallangan lojada ko'rdim. Shu sababli, menimcha, kelajakda u yana «Chelsi»ga qaytishi mumkin, ammo hozir emas», — deydi Solxekol.

Eslatib o'tamiz, Frenk Lempard murabbiy sifatida «Chelsi»ni 2019–2021 yillarda hamda 2023 yilda boshqargan. Futbolchilik faoliyati davomida esa u 2001 yildan 2014 yilgacha londonliklar sharafini himoya qilib, jami 13 ta sovrinni qo'lga kiritgan va klub tarixidagi eng buyuk futbolchilardan biriga aylangan.