Lui Saa «MYu»ni Entso Fernandesni sotib olishga chaqirdi

«Manchester Yunayted» klubi sobiq hujumchisi Lui Saa «qizil iblislar» rahbariyatiga «Chelsi» yarim himoyachisi Entso Fernandes transferi ustida ishlashni maslahat berdi.

Saaning fikricha, argentinalik futbolchi Manchester klubi markaziy chizig'ini kuchaytirish uchun eng munosib nomzodlardan biri hisoblanadi.

«Menimcha, Entso Fernandes Brunu Fernandesh bilan bir xil uslubda o'ynamaydi, lekin u baribir jamoa yarim himoyasiga juda yaxshi mos tushgan bo'lardi. Unda to'p bilan ishlashda xotirjamlik, yuqori intellekt va hujumlarni rivojlantirish qobiliyati bor.

U Kaysedo kabi toza tayanch yarim himoyachisi emas, ammo unda ham agressiya va yuqori sifat mujassam. Agar uni sotib olish imkoni bo'lsa, «MYu» bu variantni albatta ko'rib chiqishi kerak. Bu juda mantiqiy va to'g'ri qaror bo'lardi», — deya Saaning so'zlarini keltirmoqda Goal nashri.

Ma'lumot o'rnida, 25 yoshli Entso Fernandesning «Chelsi» bilan amaldagi shartnomasi 2032 yilga qadar mo'ljallangan. Nufuzli Transfermarkt portali jahon chempionining bozor qiymatini ayni damda 90 million evroga baholamoqda.