«Arsenal» ustozi «Atletiko»ga qarshi o'yinda nimalar yoqmaganini ochiqladi

Londonning «Arsenal» klubi bosh murabbiyi Mikel Arteta Chempionlar ligasi 1/2 finali doirasidagi «Atletiko Madrid»ga qarshi ilk uchrashuv (1:1) haqida o'z fikrlarini bildirib o'tdi.

Madridda kechgan bahsda har ikki gol penaltidan kiritildi: 44-daqiqada Viktor Dyokeresh «kanonirlar»ni oldinga olib chiqqan bo'lsa, 56-daqiqada Xulian Alvares muvozanatni tikladi.

«O'yinimizda ijobiy jihatlar ko'p bo'ldi. Biz ko'p yillardan beri o'z maydonida ajoyib o'yin ko'rsatib kelayotgan jamoaga qarshi to'p surdik, shu bois bizni nimalar kutayotganini bilardik. Bu erda ba'zan chidashga majbur bo'lasan. Ko'plab yaxshi vaziyatlarni ko'rdim, lekin gohida qiynalishimizga to'g'ri keldi.

Ikkinchi bo'lim boshidagi o'yinimiz menga yoqmadi — nazoratni yo'qotib qo'ydik. So'nggi 15 daqiqada esa hammasi ancha yaxshi ko'rindi. Biz Chempionlar ligasi yarimfinalidamiz va holatimiz yomon emas. Oldinda o'z uyimizdagi javob bahsi kutib turibdi. Hammasi o'z qo'limizda», — deya Artetaning so'zlarini keltirmoqda Movistar.

Eslatib o'tamiz, ushbu juftlik o'rtasidagi finalchi nomi 5 may kuni Londonda bo'lib o'tadigan javob uchrashuvidan so'ng ma'lum bo'ladi.