Hakimiy «Bavariya» bilan bahsni o'tkazib yuborishi ma'lum bo'lgach, muxlislarga murojaat qildi

«Pari Sen-Jermen» klubining o'ng qanot himoyachisi Ashraf Hakimiy Chempionlar ligasi yarim finali doirasidagi «Bavariya»ga qarshi javob uchrashuvida jamoasiga yordam bera olmaydigan bo'ldi.

Marokashlik futbolchi jamoasining o'z maydonida kechgan va 5:4 hisobidagi g'alabasi bilan yakunlangan dastlabki bahsida golli uzatmaga mualliflik qilgan edi. Yulduz lateral o'yinni oxirigacha etkazib qo'ygan bo'lsa-da, bahs yakunida jarohat olgani ma'lum bo'ldi. So'nggi ma'lumotlarga ko'ra, 27 yoshli futbolchi Myunxenda kechadigan muhim o'yinni o'tkazib yuboradi.

«Bir marta buni uddalaganman. Yana takrorlayman», — deya ijtimoiy tarmoqlardagi sahifasiga mahzun fondagi suratini joylashtirdi Hakimiy.

Eslatib o'tamiz, «PSJ»ning «Bavariya» mehmoni bo'ladigan hal qiluvchi to'qnashuvi kelasi chorshanba, 6 may kuniga belgilangan.