«Bu qarorlarning barchasi «An-Nasr» foydasiga»: Touni Saudiyadagi hakamlikni «rasvo» deb atadi

«Al-Ahli» hujumchisi Ayven Touni Saudiya Arabistoni chempionati 29-turi doirasidagi «Al-Fayha»ga qarshi o'yindan (1:1) so'ng hakamlikdan qattiq norozi bo'ldi.

O'yin davomida «Al-Ahli» foydasiga uchta penalti belgilanmadi. Jurnalist Ben Jeykobsning yozishicha, Touni qarorlar «An-Nasr»ga turnirda g'olib chiqishga yordam berish uchun ularning foydasiga chiqarilmoqda deb hisoblaydi.

«Hal qiluvchi pallalarda bunday narsalarni qanday qilib e'tibordan chetda qoldirish yoki ularga ko'z yumish mumkinligiga ishonish qiyin. Bu erda qandaydir ta'sir borligi ko'rinib turibdi.

Hakam VARni ko'rayotgan paytda bizga boshqa turnirga e'tibor qaratishni aytishi — bu umuman aqlga sig'maydigan holat.

Haqiqatni aytganim va shubhali qarorlar yoki rasvo hakamlikni ko'rsatib berganim uchun, ehtimol, meni «yomon yigit» deb hisoblashar.

Keyingi safar, agar kerak bo'lsa, o'z mahallamdan futboldan umuman xabari yo'q biror kishini taklif qilishim mumkin va u bu ishni anavi «klounlar»dan ko'ra ancha yaxshiroq uddalaydi», — dedi Ayven Touni.

Hozirda «An-Nasr» 27 o'yinda 70 ochko jamg'arib, turnir jadvalida peshqadamlik qilmoqda. Ikkinchi o'rinda «Al-Hilol» (28 o'yinda 68 ochko), uchinchi o'rinda esa «Al-Ahli» (28 o'yinda 66 ochko) bormoqda.