Roberto Badjo: "Pep Gvardiola jamoalari doim yaxshi o'ynaydi"

Italiya terma jamoasi sobiq futbolchisi Roberto Badjo "Manchester Siti" bosh murabbiyi Xosep Gvardiola haqida yuqori fikr bildirdi. Avvalroq ular "Breshiya" safida birga to'p surishgan.

"Men Pep Gvardiolani yaxshi ko'raman! Uning jamoalari doim yaxshi o'ynaydi, u o'zi faoliyat yuritgan har bir mamlakatda o'zini ko'rsata oldi. Agar hozir futbolchi bo'lganimda, uning qo'l ostida o'ynashni istagan bo'lardim", — deya Badjoning so'zlarini keltiradi jurnalist Nikolo Skira "X" ijtimoiy tarmog'ida.

Futbolchilik faoliyati davomida Roberto Badjo "Yuventus" va "Milan" tarkibida Italiya chempioni bo'lgan, turinliklar bilan birga mamlakat Kubogi va UEFA Kubogini ham qo'lga kiritgan. "Bolonya" bilan esa Intertoto Kubogida zafar quchgan.

Xosep Gvardiola o'zining murabbiylik faoliyati davomida "Barselona" va "Bavariya" klublarida ham ishlagan. Mutaxassis ushbu jamoalarning har birida ko'plab nufuzli sovrinlarni qo'lga kiritgan.