Luis Enrike: "Monako" bilan o'yinda "PSJ"ning eng yaxshi versiyasini ko'rishni istayman"

"PSJ" bosh murabbiyi Luis Enrike UEFA Chempionlar ligasining "Monako"ga qarshi bo'lib o'tadigan o'tish o'yini haqida fikr bildirdi.

"Men "PSJ"ning eng yaxshi versiyasini ko'rishni istayman. O'tgan mavsumda birinchi o'yinda imkoniyatni boy berib, ikkinchi bahsda vaziyatni o'nglay olganimizni ko'rgandik. Biz har bir uchrashuvda g'alaba qozonishni xohlaymiz va kayfiyatimiz o'zgarmaydi.

Agar futbolchilar va jamoa haqida o'zim bilgan ma'lumotlardan kelib chiqib xulosa qilsam, biz samaradorlikni oshirishimiz kerak, chunki har bir o'yinchining individual mahorati juda muhim. Men futbolchilarimizga va jamoaga ishonaman. Safarda g'alaba qozonish qanchalik qiyinligini tushunib turibmiz, ammo o'z kuchimizga ishonamiz, chunki buni avval ham uddalaganmiz", — deya Enrikening so'zlarini keltiradi "RMC Sport".

Chempionlar ligasining dastlabki o'tish o'yini 17 fevral kuni Monakodagi "Lui II" stadionida bo'lib o'tadi.