"Yuventus" "Pari Sen-Jermen" bilan hujumchi Randal Kolo-Muani bo'yicha yangi muzokara o'tkazadi.

Frantsuzning ijara muddati yakunlanmoqda - kelishuv klublar o'rtasidagi jahon chempionati yakuniga qadar mo'ljallangan, u erdan "Byankonerilar" allaqachon turnirni tark etgan. "Yuventus" "PSJ" talablariga qaramay, Kolo-Muani ijara muddatini yana bir yilga uzaytirish fikridan qaytmadi, deya xabar bermoqda insayder Janluka di Martsio. Avvalroq Parij grandi sotib olish majburiyatini o'z ichiga olmagan ijara takliflarini ko'rib chiqmasligi xabar qilingandi.

"Keksa senora" bosh murabbiyi Igor Tudor 26 yoshli forvardni o'z rejalarining muhim qismi sifatida ko'rmoqda. Transfermarkt portali futbolchining narxini 30 mln evroga baholamoqda.