"Roma" qanot himoyachisi Uesli bilan shartnoma imzoladi. Bu haqda Rim klubi matbuot xizmati o'z saytida rasman ma'lum qildi. Futbolchi Braziliyaning "Flamengo" klubidan sotib olingan.

"Rimga xush kelibsan, Uesli!" - deyiladi rimliklar saytidagi xabarda.

Jurnalist Janluka Di Martsioning ma'lum qilishicha, italyan klubi Uesli uchun "Flamengo"ga 25 mln evro to'lagan. Yana 5 mln evro bonus sifatida ko'zda tutilgan. Braziliyalik A Seriya klubida 43-raqamda harakat qiladi.

"Flamengo" safida 21 yoshli himoyachi 2021 yildan buyon to'p surib kelmoqda. Uning hisobida Braziliya klubi safida 136 ta o'yin, 4 ta gol va 6 ta golli uzatma bor. Transfermarkt ma'lumotlariga ko'ra, Ueslining narxi - 20 mln evro.