"Liverpul" ustozi Arne Slot "Milan"ga qarshi o'rtoqlik o'yinida "qizillar" tarkibida Luis Dias va Darvin Nunesning yo'qligiga izoh berdi. Jamoalar o'rtasidagi o'yin Gonkongda bo'lib o'tdi va 4:2 hisobida Italiya klubi foydasiga hal bo'ldi.

"Luis Dias bugun uning kelajagi haqidagi mish-mishlar tufayli o'ynamadi," - deya Arne Slotning so'zlarini keltiradi Mirror.

Murabbiyning so'zlariga ko'ra, Nunesning yo'qligi ehtimoliy transfer bilan bog'liq emas - urugvaylik futbolchi kichik jarohati tufayli mersisaydliklarga yordam bermadi.

Bu transfer oynasida Diasga "Bavariya" faol qiziqmoqda. O'tgan mavsumda kolumbiyalik futbolchi "Liverpul" safida 50 ta o'yinda 17 ta gol va 8 ta golli uzatmani amalga oshirgan. Nunesning statistikasi kamtarroq - 47 o'yinda 7 gol va 7 golli uzatma.