FIFA reytingi: O'zbekiston 4-pog'ona ko'tarildi

Xalqaro futbol assotsiatsiyalari federatsiyasi (FIFA) bugun jahon terma jamoalarining yangi reytingini e'lon qildi. Unga ko'ra, O'zbekiston terma jamoasi o'tgan oy reytingiga nisbatan 4 o'rin yuqorilab, 85-pog'onaga chiqib oldi.


Terma jamoamiz mart oyidagi FIFA kunlari doirasida "China cup-2019" musobaqasida ishtirok etib, Urugvayga yutqazdi va Xitoyni mag'lub etdi. Natijada reytingda hisobimizga 4 ball qo'shildi — 1279 ball.

Osiyo mintaqada O'zbekiston 11-o'rinni egallab turibdi. Eron terma jamoasi 1516 ball bilan umumiy reytingda 21-pog'onani band etgan holda, qit'aning eng yaxshi jamoasi bo'lib turibdi. Keyin o'rinlarni Yaponiya (26-o'rin), Janubiy Koreya (37), Avstraliya (41) va Qatar (55) egallab turibdi.

Reytingni esa hamon Belgiya terma jamoasi boshqarib turibdi. Kuchli uchlikka kirgan Frantsiya va Braziliya termalari ushbu oyda o'z o'rinlarini o'zgartirishmadi. Angliya esa Xorvatiyadan o'tib ketib, 4-qatorga chiqib oldi.

Reytingning to'liq ko'rinishi bilan FIFA rasmiy saytida tanishib olish mumkin.