«Madrid debisi» oldidan «Real»da ikkita yo'qotish bor

Himoyachi David Alaba va vinger Garet Beyl Ispaniya La Ligasining 26-turidan o'rin olgan «Rayo Valekano»ga qarshi o'yinda «Real»ga yordam bera olishmaydi. Bu haqda o'yinoldi matbuot anjumanida «qaymoqranglilar» bosh murabbiyi Karlo Anchelotti ma'lum qildi.

Italiyalik mutaxassisning so'zlariga ko'ra, har ikki futbolchining mushaklarida muammo bor. Shu bilan birga, Beyl «Real Sosedad»ga qarshi keyingi turdagi o'yinida maydonga tushishi mumkin.

«Rayo Valekano» - «Real Madrid» uchrashuvi 26 fevral kuni Madriddagi «Kampo de Valekas» stadionida Toshkent vaqti bilan soat 22:30da boshlanadi.