O'zbekistonlik og'ir atletikachi Maftuna Ismoilova antidoping qoidalarini buzgani sabab 4 yilga diskvalifikatsiya qilindi

Og'ir atletikachi Maftuna Ismoilovadan olingan doping-sinamada taqiqlangan modda aniqlandi. Bu haqida O'zbekiston Milliy antidoping agentligi xabar berdi.

Ismoilovadan 2021 yil noyabr oyida musobaqadan tashqari davrda olingan doping-sinamasida taqiqlangan oksandrolon va stanozolol moddalari aniqlangan.

Shu tariqa Maftuna Butunjahon antidoping kodeksining 2.1-moddasida ko'zda tutilgan antidoping qoidabuzarligi uchun 4 yil muddatga diskvalifikatsiya qilindi. Qaror 2021 yil 23 dekabrdan kuchga kirgan va 2025 yil 22 dekabrga qadar davom etadi.

Avvalroq Yunon-rum kurashchisi Sultonbek Elmurodov doping tufayli 4 yilga, dzyudo bo'yicha Rio-2016 Olimpiya o'yinlari sovrindori Diyorbek O'rozboev esa 3 yilga barcha musobaqalardan chetlatilgandi. Belbog'li kurash ustasi Mardondek Kimsanov va karate bo'yicha Osiyo chempioni Nodira Jumaniyozova, sambochi Dilshod Choriev va o'zbekistonlik 7 nafar og'ir atletikachi doping sababli 4 yilga, UFC jangchisi Liliya Shokirova esa 2 yil muddatga diskvalifikatsiya qilingani ma'lum bo'lgandi.