Frantsiya prezidenti Mbappedan iltimol qildi, «Real» esa xavotirga tushgan. «PSJ»da Kilianni olib qolishning bitta yo'li bor

«PSJ» Mbappeni «Real» bilan shartnoma imzolamaslikk ko'ndirish uchun qo'lidan kelganicha harakat qilmoqda. Klub prezidenti Nosir Al-Xelayfi ushbu muammoni hal qilishda muvaffaqiyatsizlikka uchraganidan so'ng, Kilianga Frantsiyaning asosiy shaxslari murojaat qilishdi - mamlakatning amaldagi prezidenti Emmanuel Makron va sobiq prezident Nikolya Sarkozi futbolchini parijliklar bilan shartnoma uzaytirishini iltimos qilishdi. Bu Kilianga yaqinlashib kelayotgan transfer oynasi oldidan, klub bilan yangi shartnoma imzolash haqida yana bir bor o'ylab ko'rishini bildiradi.

Avvalo, Kilian nima uchun Parij klubi safidan ketishni xohlayotganini yoki ketmoqchi ekanligini aniqlash kerak. Mbappening fikricha, «PSJ» uning atrofida jamoa o'yinini qurishi kerak. Klub yozda Leo Messi va Serxio Ramos kabi tajribali futbolchilar bilan shartnoma imzolaganidan so'ng,  futbolchining vakillari klub siyosatiga shubha bilan qarashmoqda. Bundan tashqari, Kilian va yana bir qancha frantsuz futbolchilari 2021/22 yilgi mavsumning birinchi qismida Lotin amerikalik futbolchilar jamoada bir qancha imtiyozlarga ega bo'lganidan norozi bo'ldi. (mashg'ulotlarga kechikish va shu kabi holatlarda Parij klubi rahbariyati futbolchilarni kechirgan).

Bir necha hafta oldin Kilianning yozda Madrid klubiga ko'chib o'tishi hal qilingan masaladek tuyulgan edi. Biroq, «PSJ» va «Real» o'rtasidagi Chempionlar ligasi 1/8 finalining birinchi uchrashuvidan keyingi Mbappening fikrlari ko'pchilikda shubha uyg'otdi.

«Birinchi o'yinda g'alaba qozonish — zavqli», - deb yozdi hujumchi Twitter sahifasida. «Bu Parij!»

«Real Madrid» Frantsiya poytaxtiga bir maqsad bilan keldi – mag'lub bo'lmaslik. Karlo Anchelotti parijliklarning hujumkor futbolchilariga bo'sh joy berish, o'z joniga qasd qilish bilan barobar ekanini tushunib, chuqur himoyaviy o'yinni tanladi. Faqatgina darvozabon Tibo Kurtuaning fantastik o'yini «qaymoqranglilar»ga umid uchqunini berardi.

«PSJ»ning to'liq ustunligiga qaramay, «Real Madrid» deyarli golsiz durang natijaga erishgan edi. Ammo, o'yin tugashiga bir necha daqiqa qolganda Kilian Mbappe Eder Militao va Lukas Vaskesni dog'da qoldirib, g'alaba golini kiritdi. Mbappening ushbu epizoddagi harakatlari «PSJ» va «Real» futbolchi uchun nega kurashayotganining yaqqol isbotini ko'rsatib berdi. Har ikki jamoa ham frantsuzni o'z safiga qo'shib olish uchun dahshatli summa taklif qildi. «Real Madrid» yiliga 50 million evro maosh to'lashga tayyor. «PSJ» ham bu borada ortda qolmadi va soliqlarni hisobga olmaganda 45 million evro maosh taklif qilishdi. Qaysi jamoada o'ynagan taqdirda ham kelasi mavsumda Kilian dunyoning eng ko'p maosh oluvchi futbolchisiga aylanishi aniq.

«PSJ» o'zining asosiy yulduzini saqlab qolish imkoniyatiga ega bo'lishi uchun ikkinchi o'yinda «Real»dan ustunligini isbotlashi kerak. Shuningdek, parijliklarga Maurisio Pochettinoning o'rniga EChLda g'alaba qozonishda, hamda yulduz futbolchilar bilan ishlashda tajribasi bo'lgan Zinedin Zidan  bilan shartnoma imzolash kerak. Sababi, taniqli murabbiy futbolchini jamoada olib qolishga yordam berishi mumkin. Zizu vunderkind bilan iliq munosabatda, demak yosh futbolchi mutaxassisning maslahatini qabul qiladi.

Kilian «Real» ustidan g'alaba qozonganidan keyin aytgan so'zlari Madrid klubi rahbarlarini o'ylantirib qo'ygan bo'lsa kerak, chunki futbolchi o'yindan keyin bergan intevyusida Parijda baxtli ekanligi  va dunyoning eng kuchli jamoasi safida o'ynayotganini ta'kidladi.

«Men baxtliman. Biz juda yaxshi o'yin o'tkazdik va hamma narsadan qoniqish hosil qildik. Ikkinchi o'yin oldidan ustunlik biz tomonda.

Neymar menga ajoyib uzatma berdi, men esa jarima maydonchasiga tezlik bilan raqib himoyasini yorib kirishga muvaffaq bo'ldim. Himoyachilar ortda qolishdi va men darvozabonning oyoqlari orasiga zarba berib, gol urmoqchi edim, maqsadimga erishdim.

Men bor etiborimni futbolga qaratmoqchiman. Odamlar men haqimda ko'p yolg'on xabarlar tarqatishdi. To'g'risi, men bor e'tiborimni jamoamga yordam berishga qaratganman.

Men «PSJ»da ekanligimdan baxtliman. Men dunyoning eng yaxshi klublaridan birida o'ynayotganimni anglash uchun fevral oqshomidagi «Real»ga qarshi o'yinni kutishim shart emas edi», — deydi Mbappe o'yindan keyin intervyusida.

Mbappe yaqin kunlarda qaror qabul qilish kerak. Chunki, «Real» ortiq kutishni istamayapti.

Jamshidjon Mahmudov tayyorladi.