Ronalduning yangi mojarosi - portugaliyalik «Manchester Yunayted» sardori bo'lishni xohlamoqda. Ammo jamoada boshqa yaxshiroq nomzod bor

 Britaniya OAV xabarlariga ko'ra, klub sardorlik bog'ichini ikki futbolchi talashishmoqda. Manba tarqatgan xabarlarga ko'ra, Krishtianu Ronaldu «Manchester Yunayted»ning yangi sardori bo'lishni xohlamoqda, ammo jamoaning ba'zi a'zolari bunga qarshilik bildirishmoqda.

Jamoa a'zolari Maguayrni qo'llab-quvvatlashadi, lekin Ronaldu jamoaga katta ta'sir o'tkaza olishini tan olishadi

Birinchi xabarni Mirror nashri insayderi Devid Makdonnel tarqatdi: «Ralf Rangnik, Ronaldu va Garri Maguayr mavsum yakuniga qadar sardorlik bog'ichini almashtirish masalasini muhokama qilishdi. Murabbiy bu qaror orqali jarohatdan so'ng formasini tiklay olmayotgan Maguayrga nisbatan muxlislarning e'tirozini kamaytirishga harakat qilmoqda».

Keyinchalik shunga o'xshash boshqa xabarlar ham tarqaldi:

Jamoaning ba'zi futbolchilar Ronaldu angliyalik futbolchining o'rniga sardor bo'lishiga ishonchi komil;

Futbolchilar sarosimaga tushib qolishdi: ular Maguayrni sardor sifatida qoldirish kerak, deb hisoblaydilar, lekin ular Ronalduning jamoaga katta yordam bera olishi tan bilishadi;

Portugaliyalik doimiy ravishda Maguayrni sardor sifatida qo'llab-quvvatlashini aytdi, ammo klub muvafaqiyatsizlikka uchrasa, barcha yuk Garrining elkasiga tushishini istamayapti.

Ronaldu haqiqatan ham «MYu» futbolchilariga sardorlik qila oladi

«Ronaldu faoliyati davomida yuqori natijalarga erishish uchun qilgan ishlari jamoaning boshqa o'yinchilariga ham ta'sir qildi. Men bundan juda mamnunman», - deydi «Manchester Yunayted»ning sobiq bosh murabbiyi Sulsher.

Bu esa mantiqan to'g'ri: «Old Trafford»dagi ilk kunlardanoq portugal motivator rejimini yoqib oldi.

Krishtianu Ronaldu

«Men g'alaba qozonish mentalitetini yaratmoqchiman. Bir kun butsalarimni mixga ilmoqchi bo'lsa ham, bu mentalitet jamoada qoladi. Men «Manchester Yunayted» uchun qo'limdan kelganini qilaman».

Ronalduning klubdagi obro'si ba'zi murabbiylarnikidan ham balandroq. Buni ba'zi futbolchilar bildirgan fikri orqali isbotlash mumkin.

Diogu Dalot

«Har bir futbolchining o'ziga xos odatlari bor. Misol uchun hozir o'yin oldidan mehmonxonada bo'lganimizda doim Krishtianu bilan qahva ichamiz. Bu allaqachon odatiy holga aylangan. U meni kofe ichishga taklif qildi, ammo men bu ichimlikni yoqtirmasdim. Lekin, Ronaldu bilan bir oz gaplashish va o'yin haqida fikr almashish uchun uning taklifini qabul qildim».

Sentyabr oyida «Manchester Yunayted»ning zaxira darvozaboni Li Grant shunday deydi:

- Juma oqshomida har bir futbolchi kechki ovqatdan keyin olma pirogi, qaymoq, shokoladli tort yoki boshqa shirinlik eyishi mumkin. Lekin o'sha kuni birorta futbolchi shirinlikka tegmadi. Bunaqa voqea avval hech qachon sodir bo'lmagan edi. Hammani Krishtianu nima eyishi qiziqtirardi. Uning kosasida kuinoa, avakado va bir juft qaynatilgan tuxum bor edi.  Shuning shundan so'ng hech kim shirinlik va shunga o'xshash taom iste'mol qilishga jur'at eta olmadi».

Ronaldu o'zini jamoa etakchisi sifatida tan olinishni xohlamoqda, deb yozadi Daily Mail nashri. Ba'zi o'yinchilar (asosan, portugaliyaliklar) buni to'g'ri qabul qilishdi, boshqalari esa o'z noroziligini bildirgan. Rangnik mojaroga yo'l qo'ymaslik uchun Fernandesh, Markus Reshford va Pol Pogba bilan shu mavzuda maslahatlashgani xabar qilindi.

Maguayr va Rangnik mish-mishlarni rad etishdi, Ronaldu hamon jim

Kiyinish xonasidagi kelishmovchilik haqidagi mish-mishlarni Rangnik rad etdi: «Men hech qachon jamoada sardorni almashtirish mavzusini ko'tarmaganman. Bu biz uchun muammo emas. Sardorlik bog'ichini kim olishi menga bog'liq. Garri Maguayr bizning sardorimiz va shunday bo'lib qoladi», — deya Rangnik sardorlik bog'ichi mavsum oxirigacha Maguayrda qolishini ta'kidladi.

Garri Maguayr

«Men «Manchester Yunayted» haqida juda ko'p yolg'on xabarlarga duch kelganman va bu ulardan biri. Men u OAVda yozilganlarning hammasiga izoh bermayman, lekin bu masalaga oydinlik kiritish kerak. Biz bir jamoamiz va klubda hech qanday muammo yo'q. Hammaga xayrli kun»

«Manchester Yunayted» ko'plab muxlislari Maguayrga nisbatan salbiy munosabat bildirishmoqda. Ular anchadan beri Rangnikdan himoyachini zaxira futbolchisiga aylantirib, sardorlik bog'ichini olib qo'yishni so'rashmoqda. Bu «Byornli»ga qarshi kechgan 1:1 hisobidagi o'yindan so'ng yana kuchaydi, himoyachining ketma-ket ikkita xatosi gol o'tkazib yuborilishiga olib keldi.

Krishtianu esa sardorlik bog'ichi tufayli yuzaga kelgan mojaro haqidagi ma'lumotga hozircha izoh bermadi. Bunday muammolar «Lids» bilan o'yin oldidan jamoaga yomon ta'sir ko'rsatishi mumkin.

***

Agar Garri Maguayrning kiyinish xonasidagi obro'si chindan ham pasayib ketgan bo'lsa, sardor etib Ronalduni emas, balki Bruno Fernandeshni tayinlash mantiqan to'g'ri bo'lardi. Aynan Fernandesh ingliz futbolchisi yo'qligida jamoani sardor sifatida maydonga olib chiqadi.

Boz ustiga, Krishtianu Ronalduning «Manchester Yunayted»dagi kelajagi noaniqligicha qolmoqda. Portugaliyalik futbolchi faoliyatining so'nggi ikki yilini o'rtamiyona sifatita o'tkazishni istamayapti. Turli insayderlarning xabariga ko'ra, Ronaldu «Yunayted» keyingi mavsumda Chempionlar ligasiga yo'llanma olsagina «Old Trafford»da qolishini aytgan.

Shunday ekan, to'rt oydan keyin jamoadan ketishi mumkin bo'lgan futbolchini sardor etib tayinlashning ma'nosi yo'q. Hatto u Krishtianu Ronaldu bo'lsa ham.