Simeone: «Biz mavsumni yaxshi yakunlay olamiz»

«Atletiko» bosh murabbiyi Diego Simeone La Liganing 25-turi doirasidagi «Osasuna» ustidan qozonilgan g'alaba (3:0) haqida fikr bildirdi.

«Biz o'yinni yaxshi boshladik. Markos Lorente bizga yarim himoyada kerak bo'lgan hamma narsani berdi. Vrsalko yaxshi o'ynadi va bu Markosga o'zini ko'rsatishga imkon berdi. Errera ajoyib uchrashuv o'tkazdi, Koke haqida ham shunday deyish mumkin. Ularning barchasi o'z darajasida o'ynadi» — deya Simeonening so'zlarini keltiradi Marca.

«Hayot ham xuddi futbol kabi bizni turli to'siqlar bilan sinab ko'radi. Bu mavsumda vaziyat shunday va biz mavsumni yaxshi yakunlay olamiz», — deya qo'shimcha qiladi argentinalik mutaxassis.

La Liganing 25-turidan so'ng «Atletiko Madrid» 42 ochko jamg'arib, La Liga turnir jadvalida to'rtinchi o'ringa ko'tarilib oldi. «Osasuna» 32 ochko bilan 9-o'rinda qoldi.