Diyor Imomxo'jaev: "Endi projektori yo'q stadionlarda Superliga uchrashuvlari o'tkazilmaydi"

O'zbekiston professional futbol ligasi direktori Diyor Imomxo'jaev joriy mavsum Superliganing taqvimi masalasida gapirdi.

"O'yinlarning shanba va yakshanba kunlariga to'g'ri kelmayotgani kuchli beshlik bilan bog'liq. May so'ngiga qadar Sport-TV va UzReport kuchli beshlik uchrashuvlarini translyatsiya qiladi. Aynan o'sha vaqtda biz Superliga uchrashuvlarini o'tkazsak, TV dasturlar, muxlislar e'tibori, reklama beruvchilar kabi masalalarda yutkazib qo'yamiz.

Uchrashuvlar dam olish kunlari o'tayotgan bo'lsa-da, o'yinlar ish vaqtiga to'g'ri kelmaydi. Biz shunday bosqichga etib keldikki, endi projektori yo'q stadionlarda Superliga uchrashuvlari o'tkazilmaydi. Shundan kelib chiqib, uchrashuvlarni 18:00 dan erta boshlash niyatida emasmiz.

Biz faqatgina xalqaro taqvim majbur qilgan holatdagina, shuningdek, iyun, iyul, avgust oylaridagina uchrashuvlarni shanba-yakshanba kunlariga belgilashga harakat qilamiz", - deydi Imomxo'jaev o'z telegram kanalida.