Predrag Rogan: «Mavsumni amaldagi chempionga qarshi o'yin bilan boshlash biz uchun sharaf»

Superliga yangi mavsumiga qur'a tashlangach, «Dinamo» jamoasi chempionatni amaldagi chempion «Paxtakor»ga qarshi o'tkazadigan bo'ldi. Qur'adan keyin klub matbuot xizmati jamoa bosh murabbiyi Predrag Roganning fikrlari bilan qiziqdi.

«Ochig'ini aytsam, qur'a haqida o'ylaganim ham yo'q. Sababi, biz mavsum davomida ertami yo kech baribir barcha jamoalar bilan uyda va safarda o'ynashimiz lozim.

Barcha raqiblarimiz bilan qaysi turda o'ynashimiz aniq bo'ldi. Ilk turda o'z maydonimizda mamlakatning amaldagi chempioniga qarshi maydonga tushish biz uchun katta sharaf. Biz mezbon sifatida o'z maydonimizda «Paxtakor»ga mardonavor qarshilik ko'rsatib, mavsumni yuqori kayfiyatda boshlash va Samarqand ahlini xursand qilish uchun borimizni beramiz.

Fursatdan foydalanib, samarqandlik barcha muxlislarni «Paxtakor»ga qarshi uchrashuvga taklif etib, biz yaratayotgan yangi jamoani qo'llab-quvvatlashingizni, futbolchilar esa «Dinamo» sharafini munosib himoya qilish uchun bor kuch va imkoniyatlarini ishga solishadi. G'alabalarga muxlislar bilan birga erishamiz. Olg'a, «Dinamo»!», - deydi klub bosh murabbiyi serbiyalik Predrag Rogan.

Ma'lumot uchun, Superliga 1-turi doirasidagi «Dinamo» - «Paxtakor» uchrashuvi 2-5 mart oralig'ida o'tadi.