O'FAda “Double Pass” kompaniyasi bilan videoanjuman bo'lib o'tdi

Bugun O'FA rahbariyati va Belgiyaning mashhur “Double Pass” kompaniyasi o'rtasida muzokaralar o'tkazildi.

“Double Pass” futbolni rivojlantirish hamda optimallashtirish bo'yicha federatsiyalar, ligalar, klublar, shuningdek, mutaxassislar faoliyatini sarhisob qiladigan, kerakli tavsiyalar va ta'lim beradigan taniqli kompaniya hisoblanadi.

Bugungi muzokaralar davomida kompaniyaning innovatsion dasturlarini o'zbek futboliga, ayniqsa, futbolning texnik jihatlariga joriy etish istiqbollari muhokama qilindi.

O'FA birinchi vitse-prezidenti Ravshan Ermatov o'zbek futboli rivoji uchun zamonaviy yondashuvlar bilan bir qatorda Evropaning etakchi davlatlarida muvaffaqiyatli qo'llanilayotgan usullarni ham o'rganish zarurligini ta'kidladi. Etakchi kompaniyalar bilan aloqalarni yanada chuqurlashtirish, ularning tajribasini futbolimizga bosqichma-bosqich joriy etishdan manfaatdorligini bildirdi.

“Double Pass” direktori Xans Vander Elts o'zbek futboli rivojiga katta qiziqish bildirib, O'zbekistonda mahalliy mutaxassislar uchun muntazam seminarlar tashkil etishni taklif etdi. Seminarlar 6 moduldan iborat bolib futbol mutaxassislari bilimini yangi bosqichga olib chiqishga xizmat qiladi.