"Qo'qon-1912" Toshkentdagi mashg'ulotlarni davom ettirmoqda. Ertaga nazorat o'yini bor

"Qo'qon-1912" jamoasining Toshkent shahrida olib borayotgan o'quv-yig'in mashg'ulotlari davom etmoqda.

Baxtiyor Ashurmatov shogirdlari kuniga ikki mahaldan mashg'ulotlarda ishtirok etishyapti. Jamoaning bugungi mashg'ulotlari Toshkent viloyatidagi "Do'stlik" stadionida bo'lib o'tdi. Mashg'ulotlarda "Xokim kubogi-2022" turnirida olgan jarohatlari sababli Oybek Rustamov hamda Shaxzodbek Nurmatovlar ishtirok etmayapti. Qolgan barcha jamoa a'zolari yangi mavsumga tayyorgarlikni ko'tarinki ruhda olib borishmoqda.

Murabbiylar shtabi futbolchilarni yangi mavsumga har tomonlama puxta tayyorlash uchun bor mahoratlarini ishga solishmoqda. Ertaga "shunqorlar" avvaldan rejalashtirilgan nazorat o'yinida maydonga tushadi. Jamoaning ertangi o'yindagi raqibi Buxoroning "Buxoro" jamoasi bo'ladi.

"Qo'qon-1912" - "Buxoro" jamoalari o'rtasidagi nazorat o'yini ertaga, 12 fevral kuni, soat 14:00da, "Do'stlik" stadionida boshlanadi.