«Inter» - «Milan» o'yinida yuz bergan holat bo'yicha intizomiy choralar e'lon qilindi

Italiya sport qo'mitasi Italiya chempionatining 24-turidan o'rin olgan "Inter" va "Milan" jamoalari o'rtasidagi uchrashuvda ro'y bergan holatlar yuzasidan qaror chiqardi.

"Neradzurri" himoyachisi Alessandro Bastoni 2ta o'yinga chetlatildi. Shu bois, u "Napoli"ga qarshi safarda bo'ladigan muhim uchrashuvni o'tkazib yuboradi. Bastoni 82-daqiqada zaxiraga olingan bo'lib, maydonni tark etish paytida "Milan" himoyachisi Teo Ernandes bilan mojaroga bordi. Bundan tashqari, futbolchi zaxira o'rindig'ida o'tirib, yordamchi hakamni bir necha marta haqorat qilgan. Shu bois, unga qizil kartochka ko'rsatilgandi.

Shuningdek, "Inter" bosh murabbiyi Simone Indzagi shunga o'xshash sabab tufayli bitta bahsga diskvalifikatsiya qilindi. Indzagi 15 ming evro miqdorida jarimaga ham tortildi.

"Inter" hujumchisi Lautaro Martines ham Teo Ernandes bilan mojaroga borgani uchun 10 ming evro miqdorida jarima to'laydigan bo'ldi.

Ernandesning o'zi esa bitta o'yinga chetlatildi va 5 ming evro miqdorida jarimaga tortildi. U derbining so'nggi daqiqalarida raqib jamoa muxlislariga nisbatan provokatsiya qilgani uchun maydondan chetlatilgandi.