«Buxoro» bosh direktori: «Jamoa Superliga yo'llanmasiga ega bo'lishi uchun borimizni beramiz»

"Buxoro" futbol klubi bosh direktori O'tkir Qodirovga bir necha savollar bilan yuzlandik.

— O'tkir Olimovich, hozirda «Buxoro» futbol klubida olib borilayotgan ishlar, qilinajak vazifalar haqida qisqacha so'zlab bersangiz.
— Men «Buxoro» futbol klubida bosh direktor vazifasida ish boshlaganimga, endigina bir oy bo'ldi. Albatta, tarixi buyuk jamoada rahbar bo'lib ishlashning, o'ziga yarasha ma'suliyati kuchli bo'ladi. Hozirgi kunga qadar, klub oldida turgan muammolarni bartaraf etish uchun, tinim bilmay ishlayapmiz, chunki yangi mavsumga ko'p vaqt qolmadi. O'tgan mavsumda, jamoamizda to'p surgan legioner futbolchilar, Raxat Japarov va Marko Milich bilan bo'lgan tushunmovchiliklarni, deyarli hal qilib bo'ldik. Shuningdek texnik direktor lavozimida ishlagan Baxtiyor Dadamatov bilan kelishuvga erishdik. Lekin, hali qilinishi kerak bo'lgan ishlar talaygina, tojikistonlik ikki murabbiy yordamchilar va bir futbolchi bilan muzokoralar olib borilmoqda. Umid qilamanki, ushbu masalalar ĥam, yaqin vaqi ichida, ijobiy echimini topadi.

— Bu yilgi «Buxoro» jamoasining selektsiya ishlari qanday o'tdi, tarkib haqida nima deya olasiz.
— Buxoro futbolini rivojlantirish maqsadida tashkil etilgan «Kengash» a'zolari tomonidan, bosh murabbiylikka Hakim Fuzaylov nomzodi tasdiqlangach, unga Superliga yo'llanmasini qo'lga kiritish asosiy vazifa sifatida yuklatildi. Hakim Fuzaylov jamoani shakllantirish va selektsiya ishlarini to'liq o'zi olib bormoqda. Men esa bosh direktor sifatida, faqat moliyaviy masalarni hal qilib boryapman. Jamoamizda bir qator tajribali futbolchilar jam bo'lishdi. Umid qilamanki, barchamiz bir ahil oila bo'lib, «Buxoro» jamoasi oldida turgan barcha muammolarni bartaraf etib, yangi mavsumga shay holatda maydonga chiqamiz. Muxlislar katta futbolni, qolaversa sevimli jamoamiz bo'lmish «Buxoro»ning o'yinlarini sog'inishgan. Nasib qilsa, ushbu mavsumda ularni xursand qilish, jamoamizni Superliga yo'llanmasiga ega bo'lishi uchun borimizni beramiz. Bizning muxlislar bunga arziydi.