Oliver Sharkich: "O'zbekistonning eng katta klubida o'zimning nimalarga qodirligimni ko'rsatishni istayman"

Jamoamiz safiga yangi kelib qo'shilgan Oliver Sharkich taklif, klub va shahar haqida dastlabki taassurotlari bilan o'rtoqlashdi.

"Paxtakor"ning taklifini qanday qabul qilding?

- Murabbiy Voyneski klub bilan shartnoma imzolagandan so'ng menga aloqaga chiqdi va "Paxtakor"ga olib kelmoqchi ekanini aytdi. Buni muhokama qildik va O'zbekistonning eng katta klubiga kelishga tayyor ekanimni his qildim.

Qarorga kelishda kimlar bilan maslahatlashding?

- Oilam bilan muhokama qildik. Ularning ham fikrini olishim kerak edi. Keyin birgalikda bu o'zimni Chempionlar Ligasi va Superligada ko'rsatishim uchun ajoyib imkoniyat degan qarorga keldik.

"Paxtakor"ning taklifidan keyin klub haqida nimalarni o'rganding? Angliyadan O'zbekistonga ko'chib o'tishga qaror qilish qiyin bo'lmadimi?

- Klub haqida ko'p bo'lmasa ham bilardim. Taklifdan keyin klub haqida ko'p narsalarni o'rgandim va top jamoada o'ynash ajoyib g'oya ekani bilindi. Men uchun mamlakatlarni almashtirish hayajonli. Angliya, Belgiya, Portugaliya va Ispaniyada yashaganman. Endi O'zbekistondaman. Bu dunyoning yangi qirralarini kashf qilish va til o'rganish bo'yicha ham ajoyib imkoniyat.

Klub va shahar haqida dastlabki taassurotlaring qanday?

- Ilk taassurotlar juda ijobiy va yoqimli. Klubda ishlar juda yaxshi yo'lga qo'yilgan, xodimlar va futbolchilar professional. Toshkent Evropa shaharlaridan farqli. Bu erda juda do'stona munosabatni his qilyapman. Shahar juda chiroyli. Taomlar mazali ekanini bilishga ulgurdim.

Shaxsiy va jamoaviy maqsadlaring qanday?

- Shaxsiy maqsadim g'alaba qozonish, gollar urish va yaxshi o'yin namoyish etgan holda Chernogoriya milliy terma jamoasidan taklif olish. Hozir "Paxtakor"ning sobiq bosh murabbiyi Miodrag Radulovich Chernogoriya terma jamoasida ishlamoqda. Jamoaviy maqsad esa birinchi navbatda mavsumga tayyor bo'lish, keyin Superkubokda zafar quchishni istaymiz. Chempionatda g'olib sifatida qolishni xohlaymiz va Chempionlar Ligasida uzoqroq bosqichgacha etib borish niyatidamiz.

Muxlislarga qanday tilaklar bildirgan bo'larding?

- Bizni qo'llab-quvvatlab turishlari va jamoa jiddiy hozirlik ko'rayotgan yangi mavsumdan zavq olishlarini tilayman. Biz mavsumni muvaffaqiyatli qilishga urinamiz. Ular bilan stadionda uchrashish va o'zimning nimalarga qodirligimni ko'rsatishni sabrsizlik bilan kutmoqdaman. O'zbekistonda o'zimni ko'rsatishga tayyorman.

Manba: "Paxtakor" matbuot xizmati