Keyrush Eto'Oga javob qaytardi

Misr terma jamoasi bosh murabbiyi Karlush Keyrush Afrika millatlar kubogi yarim final bosqichi bahsi arafasida Kamerun futbol assotsiatsiyasi prezidenti Samyuel Eto'Oning so'zlariga javob qaytardi. Avvalroq Eto'O Misrga qarshi bahsni "jang"ga qiyoslab, vatandoshlarini ruhlantirishga uringandi.

"Men Eto'Oning so'zlarini muvaffaqiyatsiz izoh deya hisoblayman va bu Kamerun xalqi uchun yomon chorlov. Bir necha kun avval stadionda kamerunliklar vafot etganini u unutgan ko'rinadi. Shunga qaramay, bitta o'yinga nisbatan u urush e'lon qilishi professional futbolchi sifatida hech narsani o'rganmaganini ko'rsatadi. Futbol — bu jang emas, bu bayram, quvonch va baxt. Jangga qarshi biz futbol bilan javob qaytaramiz.

Biz bu erga xalqimizni xursand qilgani kelganmiz, ularni o'lishga majbur qilish uchun emas. Ularga quvonch baxsh etishni xohlaymiz.

"Kamerun bizga qarshi jang e'lon qilgani uchun Afrika futbol konfederatsiyasi Eto'Oning ishini ko'rib chiqishi lozim. Chunki, bunday bayonot berish qizil kartochka bilan teng", — dedi Keyrush.

Eslatib o'tamiz, Kamerun — Misr uchrashuvi 3 fevral kuni bo'lib o'tadi. Ikkinchi yarim finalda Senegal Burkina-Faso bilan to'qnash keladi.