O'zbekiston Milliy Olimpiya qo'mitasi raisi Rustam Shoabdurahmonov Midori Honda boshqaruvidagi O'zbekiston ayollar milliy terma jamoasi mashg'ulotiga tashrif buyurdi.

Avval xabar berganimizdek, O'zbekiston ayollar milliy terma jamoasi boshqaruvini tajribali mutaxassis Midori Honda o'z qo'liga oldi. Bugun Chig'atoy bazasida yaponiyalik murabbiy ilk yig'inini boshladi. Birinchi mashg'ulotlarga MOQ raisi Rustam Shoabdurahmonov va O'zbekiston futbol assotsiatsiyasi birinchi vitse-prezidenti Ravshan Ermatov tashrif buyurishdi hamda yaponiyalik mutaxassislar faoliyatiga omad tilashdi. Oldimizda turgan maqsadlar yo'lida jamoamizga barcha sharoitlar taqdim etilishini ma'lum qilishdi. Hususan Rustam Mavzurovich MOQ tomonidan jamoa uchun zarur tibbiy tekshiruvlar va mualajalarni taqdim etilishini ta'kidlab o'tdi.

Futbolchilar bilan suhbatda jamoa manfaati yo'lida barcha bir tan-u bir jon bo'lib harakat qilish kerakligi aytildi. Shuningdek, rahbariyat terma jamoamiz Parij olimpiadasida ishtirok etishiga tilak va ishonch bildirilib, bu yo'lda bo'lajak turnirlarning ahamiyati, ularga tizimli va sifatli tayyorgarlik ko'rish, yurtimiz sharafini munosib himoya qilish zarurligi, doimiy ravishda mehnat qilib borish muhimligi ta'kidlandi.

Suhbat yakunida O'zbekiston ayollar milliy terma jamoasining bosh murabbiyiga MOQning maxsus sovg'asi topshirildi.