Azmun 2016 yili "Bayer"ga o'tishi kerak edi

Sardor Azmun «Bayer» safiga «Rubin»da o'ynab kezlariyoq o'tishi mumkin bo'lgan. Biroq, transfer hozir sodir bo'ldi. Bu haqda futbolchining tarjimoni Bako Pachoev xabar berdi.

«Yozda «Bayer» birinchi marta aloqaga chiqdi. «Bayer» va «Zenit» Azmunning vakillariga murojaat qilishdi. Lekin, «Bayer» 2016 yildan beri Sardorni o'z safiga qo'shib olishni xohlardi. Ular JCh-2016dan avval «Rubin»ning o'quv-yig'in mashg'ulotlariga tashrif buyurishgandi.

Sardor klub qarorini kutdi. Uning pozitsiyasi oddiy edi — agar barchani bu taklif qoniqtirsa, ketishga tayyor edi. Agar klublar kelisha olsa Germaniyaga ketishini bildirdi. Agar qoniqish hosil qilishmasa, u holda shartnomasini yakunlab qo'yish niyatida edi», - dedi Pachoev.

Shuningdek, Pachoevning ma'lum qilishicha, Azmun o'sha paytda "Zenit"ga o'tish uchun APLdan tushgan takliflarni rad etgandi.