«Chelsi» Tuxelning bir yillik natijasini sarhisob qildi

Germaniyalik mutaxassis "Chelsi" tarixiga kirdi.

Londonning «Chelsi» klubi o'zining rasmiy saytida Tomas Tuxelning bosh murabbiy sifatidagi faoliyatining birinchi yildagi statistik natijalarini e'lon qildi.
Germaniyalik mutaxassis "Chelsi" klubini 2021 yilning 26 yanvar kuni qabul qilib olgandi. U klub tarixida bir yil ichida jamoani EChL, Angliya Kubogi va Angliya Liga Kubogi finaliga olib chiqqan birinchi murabbiyga aylandi.

«Chelsi» Tuxel qo'l ostida 59,7 foiz g'alaba qozondi. U ikki marta APLning oy murabbiyiga aylandi (mart va oktyabr oylarida). Nemis mutaxassisi qo'l ostida "ko'klar" APLning har bir o'yinida o'rtacha 0,72 gol o'tkzib yuborishdi (43 o'yinda 31 gol). Bu ligadagi boshqa jamoalardan ancha kam.

Bundan tashqari, «Chelsi» Angliya chempionatida "quruq" o'yinlar soni bo'yicha ham peshqadamlik qildi - 43 o'yinning 21 tasi.

Tuxel 36 nafar futbolchining xizmatidan foydalandi. Ularning 14 nafari «Chelsi» akademiyasi tarbiyalanuvchilari. Shuningdek, «ko'klar» tarkibida 22 nafar futbolchi gol kiritdi (avtogollar inobatga olinmadi). «Chelsi» 53,7 foiz o'yinda o'z darvozasi dahlsizligini saqlab qoldi - 67 ta o'yinning 36 tasida gol o'tkazmadi.

Tuxel o'tgan yili FIFA tomonidan yil murabbiyi deb topildi. Qolaversa, Tomas Germaniyada ham eng yaxshi murabbiy bo'ldi. Uning qo'l ostida «Chelsi» EChL g'olibligini va UEFA Superkubogini qo'lga kiritdi.