EChLning 2ta o'yini neytral mamlakatga ko'chirilishi mumkin

Frantsiyada joriy qilingan majburiy vaktsina qoidasi tufayli Evropa chempionlar ligasining 2ta uchrashuv boshqa maydonga ko'chirilishi mumkin. Gap «Lill» - «Chelsi» va «PSJ» - «Real» o'yinlari haqida ketmoqda.

«UEFA fevral oyida boshlanadigan klublar o'rtasidagi musobaqa oldidan butun Evropa bo'ylab barcha tomonlar bilan aloqani ushlab turibdi. Uchrashuvlarni o'tkazish bilan bog'liq shartlar mamlakatlarning sog'liqni saqlash vazirligi ixtiyorida. Har bir klub o'yin bo'lib o'tadigan mamlakat qoidalariga bo'ysunishi kerak. Ammo pley-off bosqichi bahslarini o'tkazish uchun koronavirus bilan bog'liq maxsus qoidalar ishlab chiqilmoqda. Ushbu qoidalar qo'shimcha tavsiyalarni beradi», - deyiladi UEFA bayonotida.

UEFA qoidalarida aytilishicha, mezbon jamoa neytral mamlakatda joylashgan zaxira maydonini taklif etishi kerak.

Eslatib o'tamiz, Frantsiyada qabul qilingan qoidaga ko'ra, futbolchilar majburiy ravishda vaktsina olishi kerak. Bu qoida mamlakatga tashrif buyuradigan boshqa davlat klublariga ham tegishli. Hozirda «Chelsi» va «Reala» klublari safida vaktsina olmagan futbolchilar bor.