Unutilmas kun! Sport va estrada yulduzlarining tashrifi, betakror sahna ko'rinishlari va «Humo arena» ochilishining boshqa voqeliklari

2019 yil 15 mart. Bu kun o'zbek sporti tarixida unutilmas sanalardan biri sifatida yodimizda qoladi. Biroz avval o'z bag'riga 12 500 muxlislarni sig'dira oladigan “Humo arena”ning tantanali ochilish marosimi bo'lib o'tdi.

Yurtboshimiz Shavkat Mirziyoev tashabbuslari bilan qurilgan mazkur sport ob'ekti Markaziy Osiyoda yagona bo'lib, so'nggi jahon standartlariga to'laqonli javob beradi. Tantanali ochilish marosimida O'zbekiston Respublikasi Prezidenti Shavkat Mirziyoevning o'zlari ham ishtirok etgani voqelik ne chog'li ahamiyatli ekanini anglatmoqda.

“Yurtimizning barcha hududlarida, hatto olis tumanlarda zamonaviy va ommabop sport infratuzilmasi yaratilmoqda. Jismoniy tarbiya va sport bilan shug'ullanuvchilar soni oshib bormoqda. Keyingi ikki yilda O'zbekiston sportchilari xalqaro musobaqalarda mingdan ziyod, shu jumladan, 400 dan ortiq oltin medallarni qo'lga kiritdi. Vatanimiz sportchilari figurali uchish, xokkey, tog' chang'isi, fristayl, snoubord kabi eng tomoshabop qishki sport turlarida ham munosib ishtirok etishlariga intilmoqdamiz. Fristayl bo'yicha qishki Olimpiya o'yinlari va jahon chempionatlaridagi oltin medallar, figurali uchish bo'yicha Osiyo o'yinlari va boshqa xalqaro musobaqalarda qo'lga kiritilgan etmishdan ortiq medal bu boradagi yutuqlarimizdir. Biz ushbu shonli sport an'analarini davom ettirishni burchimiz deb bilamiz”, – dedi O'zbekiston Respublikasi Prezidenti Shavkat Mirziyoev.

Shundan so'ng arenani foydalanishga topshirish uchun ramziy kalit topshirildi. Tadbirning davomi shuning bilan tantanali ochilish marosimiga ulanib ketdi. Mazkur tantanali marosimda O'zbekiston Milliy Olimpiya qo'mitasi rahbariyati ham ishtirok etdi.

Tashkilotchilar tomonidan sahnalashtirilgan badiiy chiqishlar yig'ilgan muxlislarga bir olam quvonch bag'ishladi. Marosim davomida o'zbek, rus xokkeyining faxriy yulduzlari va yosh o'zbek xokkeychilari ishtirokida kichik o'yin o'tkazildi. Bunday o'yinning tashkil etilishi ertaga xokkeyimiz kelajagi bo'ladigan yosh klyushka ustalarining o'zlari tanlagan sport turiga yanada katta mehr qo'yishiga zamin yaratadi, albatta.

Marosim davomida muz ustida nafis uchish bo'yicha Olimpiada chempioni Tatyana Navka va uning jamoasi tayyorlagan sahna ko'rinishi tadbirni bezab bergan chiqishlardan bo'ldi.

Shundan so'ng o'zbek va rus estrada yulduzlari ijrosida tashkil qilingan kontsert dasturi bayram ustiga chinakam bayram bo'ldi.

Shu tariqa “Humo arena” muz saroyining tantanali ochilish marosimi o'z yakuniga etdi. Umid qilamizki, ushbu muhtasham sport inshootining bunyod etilishi mamlakatimizda qishki sport turlarining rivojlanishida, sportning ommaviyligini oshirishda beqiyos ahamiyat kasb etadi.