Jasur Matchanov: «Xokkey bizda avvaldan rivojlangan»

Bugun o'zbek sporti muxlislari orzuqib kutgan kun etib keldi. Gap shundaki, yana birozdan so'ng poytaxtimizdagi “Afrosiyob” va “Beshyog'och” ko'chalari tutashgan joyda “Humo arena” muz saroyining ochilish marosimi bo'lib o'tadi. Bugun ushbu tarixiy voqelik avvalidan rasmiy matbuot-anjumani bo'lib o'tdi.

Unda O'zbekiston MOQ nomidan tashkilot Bosh kotibi Jasur Matchanov ishtirok etdi.

“Xokkey bizda avvaldan rivojlangan. Biroq so'nggi yillar xokkey va boshqa bir qator qishki sport turlari biroz e'tiborimizdan chiqib qolgandek edi. Qishki sport turlaridan xalqaro maydondagi natijalarimiz maqtanarli bo'lmasligiga sabab shug'ullanish uchun etarli sharoit bo'lmagan.

Qolaversa, qish o'lkamizda 2 oy davom etadi. “Humo arena” foydalanishga topshirilgach, yilning istalgan vaqtida qishki sport turlari bilan shug'ullanish uchun sharoit bo'ladi”, – deydi Jasur Matchanov.