Evropa ligasi. Chorak final va yarim final qur'asi haqida

Evropa ligasida nimchorak final bosqichi yakunlanib, chorak finalga chiqqan 8 jamoaning nomi aniq bo'ldi. Bugun turnirning chorak final va yarim final bosqichiga qur'a tashlash marosimi bo'lib o'tadi.

Qachon va qaerda?
Evropa ligasi chorak final va yarim final bosqichiga qur'a tashlash marosimi UEFA qarorgohi joylashgan Shveytsariyaning Non shahrida bo'lib o'tadi. Tadbir Toshkent vaqti bilan 17:00da boshlanadi (16:00da esa EChL qur'asi bo'lib o'tadi).

Chorak finalga chiqqan jamoalar:
"Ayntraxt" (Germaniya)
"Arsenal" (Angliya)
"Benfika" (Portugaliya)
"Valensiya" (Ispaniya)
"Vilyareal" (Ispaniya)
"Napoli" (Italiya)
"Slaviya" (Chexiya)
"Chelsi" (Angliya)


Qur'a mexanizmi
— Qur'a "ko'r-ko'rona" printsipi asosida o'tkaziladi. Jamoalar savatchalarga ajratilmaydi. Bir mamlakat klublari o'zaro to'qnash kelishi mumkin.

— Qur'ada nomi birinchi chiqqan jamoa dastlabki o'yinni o'z uyida o'tkazadi. Lekin Angliyaning ikki jamoasi klublari uy o'yinlarini bir kunda o'tkazishmaydi. Shuning uchun, agar "Arsenal" va "Chelsi"ning uy o'yinlari bitta haftaga to'g'ri keladigan bo'lsa, "kanonirlar"ning "uy-safar" bahslarining o'rni almashtiriladi. Bunday qoidaga yarim final bosqichida ham amal qilinishi mumkin.

— Chorak final bosqichi qur'asidan so'ng darhol yarim finalga ham qur'a tashlanadi. Shundan so'ng Bokuda o'tadigan final uchrashuvining nominal mezbonini aniqlash maqsadida ham qur'a tashlanadi.

Qur'ani qaerda tomosha qilish mumkin?
Marosimni FUTBOL TV, shuningdek, Rossiyaning MATCh TV, MATCh FUTBOL 1 va EVROSPORT kanallari orqali tomosha qilish mumkin.

O'yinlar qachon o'tkaziladi?
Chorak finalning dastlabki o'yinlari 11 aprel, javob bahslari 18 aprel kuni o'tkaziladi. Qur'adan so'ng taqvimning batafsil ko'rinishi e'lon qilinadi. Yarim final o'yinlari 2 va 9 may, final esa 29 may kuni Bokudagi "Olimpiya" stadionida bo'lib o'tadi.