«Lokomotiv» bosh murabbiyi Shomurodov haqida fikr bildirdi

Nonushta mahali "Lokomotiv" klubi murabbiylar shtabi o'tirgan stol atrofida asosiy mavzu Eldor Shomurodov bo'ldi.

"Ma'lum tajribaga ega murabbiy sifatida diyoringizga kelgan ilk kunlardanoq sizda yoshlar ancha iqtidorli ekanligi e'tiborimni tortgandi", – so'zida davom etardi bosh murabbiy Sekeyra, – "Ammo ushbu iste'dodli futbolchilar “top” jamoalargacha etib bora olmayotganiga e'tibor qaratib, balki faqat mening taassurotimda ular iqtidorliday ko'rinayotgandir deb o'ylagandim. Yo'q, unday emas ekan. Adashmabman. Mana Eldor kabi oddiy bir o'zbek o'g'loni Mourinodek “top” murabbiy nazariga tushib, Evropaning kuchli jamoalaridan biri safiga qo'shilib ulguribdi-ki, demak, haqiqatan ham shunday: Sizda yoshlar juda iqtidorli. Asosiysi ularga to'g'ri yo'nalish bera olsangiz bo'lgani".

Tamaddi bahonasida bizni eshitib turgan yosh futbolchilarga qarab, “Ular uchun evropalik mutaxassisning so'zlari motivatsion ta'sir qilgani va dillarida Eldordek yutuqlarga erishish orzusi o'tgani aniq”, degan o'y o'tdi xayolimdan. Zero, barcha buyuk ishlar yaxshi niyatdan boshlanadi.

Abror Pirriev
"Lokomotiv" klubi shifokori.