«Buxoro» legioner futbolchilari bilan to'liq hisob-kitob qildi

“Buxoro” 2015 yildan buyon FIFA e'tiborida qolib ketayotgandi. Moldovalik futbolchilarga berari bor bo'lgan klub, bir necha kun avval barcha qarzlaridan mosuvo bo'ldi.

Birinchi navbatda Vadim Kravcheskuga 66 million so'mga yaqin pul o'tkazib berildi. Keyin esa Vitaliy Plamadela 72 million so'mdan ko'proq pulini qabul qilib oldi. Avvalroq jamoa Vadim Chemirtan muammosini ham hal qilishga  erishgandi.

Shu tariqa FIFAning “Buxoro”ga nisbatan e'tirozi qolmadi. Endi jamoa Superligada o'ynayotgan uch futbolchi — Shavkat Mullajonov, Aziz Ibragimov, Arslonmurod Omonov bilan hisob-kitob qilishi kerak. Bu ish PFL nazoratida turibdi. Klub yaqin orada bu qarzlaridan ham qutiladi.

2015 yildan buyon qattiq turilganida, “Buxoro”ning bugungi rahbariyati ham shuncha qiynalib, avvalgilarning aybi uchun tovon to'lab yurmas edi. Bugun va avvalgi holatni solishtirayotganda shularga ham e'tiborli bo'lishingizdan umidvormiz