Tokio-2020. Badiiy gimnastikachilarimiz finalga yaqin kelishdi

Badiiy gimnastika bo'yicha guruh mashqlarida ishtirok etayotgan qizlarimiz ham Olimpiya o'yinlarida saralash bosqichi doirasida birinchi va ikkinchi mashqlarni bajarishdi.

Ekaterina Pirojkova qo'l ostidagi tayyorlangan qizlarimiz (Nilufar Shomurodova, Kseniya Aleksandrova, Dinara Ravshanbekova, Sevara Safoeva, Kamola Irnazarova)dastlabki chiqishda 5 ta to'p bilan tayyorlagan dasturlarini namoyish qilishdi. Hamyurtlarimizning chiqishi hakamlar tomonidan 42.100 ball bilan baholandi. Ilk mashqdan keyin jamoamiz 5-o'rinni egalladi.

Biroz avval qizlarimiz yana bir dasturda o'z chiqishlarini namoyish etdilar. Unda 3 halqa va 2 juft bulavada mashq bajarish bo'yicha dastur hakamlar hukmiga havola etildi. Bu safar jamoamiz biroz past ball oldi — 36.900 (11-o'rin).

Ikkita mashq uchun berilgan baholar yig'indisi esa 79.000 ballga teng bo'ldi. O'zbekistonlik qizlar yakunda 9-o'rinni egallashdi va finalga chiqish uchun ozgina ball etmay qoldi. Jamoamiz finalda ishtirok etishi mumkin bo'lgan zaxira variantiga kiritildi. Finalga chiqqan 8ta jamoadan birortasi ishtirok eta olmay qolsa, uning o'rniga O'zbekiston vakillari taklif etiladi.

Badiiy gimnastika, jamoaviy
1 . Bolgariya — 47.500  (1)  + 44.300  (1)  = 91.800 (final)
2. Rossiya  — 45.750  (2) + 43.300  (3) = 89.050 (final)
3. Italiya — 44.600  (3) + 42.550  (4) = 87.150 (final)
4. Isroil  — 44.000  (4) + 40.650  (7) = 84.650 (final)
5. Xitoy  — 41.600  (6) + 42.000  (5) = 83.600 (final)
6. Ukraina  — 41.450  (7) + 41.250  (6) = 82.700 (final)
7. Yaponiya  — 40.400  (8) + 39.325  (8) = 79.725 (final)
8. Belarus  — 36.000  (12) + 43.650  (2) = 79.650 (final)
9. O'zbekiston — 42.100  (5) + 36.900  (11) = 79.000 (zaxira)
10. Ozarboyjon — 36.700  (10) + 37.650  (10) = 74.350 (zaxira)