«Navbahor» – «Qo'qon-1912» o'yinida mezbon kim?

“Navbahor” va “Qo'qon-1912” klublari o'rtasidagi bellashuv Farg'onadagi "Istiqlol" stadionida o'tishidan kelib chiqib, savollar berilyapti: kim mezbon?

PFL mavsum avvalida stadionini rekonstruktsiya qilayotgan klublarga boshqa stadionda o'ynash uchun ruxsat berilishi haqida aytgan. Oddiy misol, “Andijon” stadionida ish olib borayotgani uchun mazkur klub ilk turni Navoiyda o'tkazadi. Ikkinchi davrada esa Navoiy klubi Andijonga keladi.

“Navbahor” va “Qo'qon-1912” klublarida vaziyat boshqacharoq. Ularning har ikkisi ham stadionida ta'mirlash ishlarini olib bormoqda. Shundan kelib chiqib, mezbon “Navbahor”ga stadion tanlash huquqi berildi. Namanganliklar Olmaliqda ham, Farg'onada ham va hatto Toshkentda ham o'ynashi mumkin edi. Klub #istiqlol stadioni bilan kelishuvga erishdi. Mazkur uchrashuvda mezbon — “Navbahor”.

Chiptalar masalasi “Navbahor” rahbariyati kelishuvni qanchalik puxta qilganiga bog'liq. Ideal holatda stadionga ijara puli to'lab berilsa, “Navbahor” chiptalarning asosiy qismiga egalik qilishi va mehmon jamoaga reglamentda belgilab berilgani bo'yicha chipta taqdim etishi kerak bo'ladi.

Diyor Imomxo'jaev