Timurxo'ja Abduholiqov: «Lokomotiv»ning taktikasi tajovuzkor o'yin ko'rsatish»

Toshkentning “Lokomotiv” jamoasi bugun, 4 mart kuni OChL guruh bosqichi 1-tur uchrashuvida o'z uyida BAAning “Al Vahda” jamoasini qabul qilib, 2:0 hisobida g'alaba qozondi.

Ushbu uchrashuvdan so'ng “Lokomotiv” jamoasi hujumchisi Temurxo'ja Abduholiqov Worldnews.uz axborot agentligi muxbiriga o'z fikrlarini bildirib o'tdi.

“Osiyo chempionlar ligasida oson o'yinning o'zi bo'lmaydi. Har bir uchrashuv qiyin bo'lishi aniq. Birinchi bo'limda yaxshi o'yin ko'rsatdik.

Ikkinchi bo'limda biroz himoyaga e'tibor qaratdik. Ikkinchi bo'limda raqib jamoaning o'yiniga moslashib qoldik. Shuning uchun ham biroz qiyin o'yin o'tkazdik.

Asosiysi 3 ochkoni qo'lga kiritdik. Biz vaziyatdan kelib chiqib o'yin ko'rsatamiz. Bizning taktikamiz, to'pni ko'proq  o'zimizda ushlab turish va tajovuzkor o'yin ko'rsatish.

Biz g'alaba qozonish uchun maydonga tushgan edik. Muxlislarimiz oldida yuzimiz yorug' bo'ldi”, deydi Abduholiqov.

Eslatib o'tamiz, Timurxo'ja Abduholiqov O'zbekiston terma jamoasidan yangi chaqiruv olgani bugun ma'lum bo'ldi.