Andijonda tijorat banklari o'rtasida «Viloyat hokimi Kubogi» mini-futbol musobaqasi yakuniga etdi

Andijon  viloyat futbol assotsiatsiyasi, viloyat Markaziy bank boshqarmasi bilan hamkorlikda bank xodimlari o'rtasida sog'lom turmush tarzini targ'ib qilish uchun sport tadbiri tashkil qilindi.

Viloyatda o'tkazilayotgan ommaviy sport oyligi munosabati bilan 16 fevral - 3 mart kunlari mini-futbol bo'yicha viloyatda faoliyat yuritayotgan tijorat banklari o'rtasida "Viloyat hokimi Kubogi" musobaqasi o'tkazildi.

Musobaqada 16ta tijorat banklari 4 guruhga bo'lingan holda shahardagi Andijon viloyati futbol assotsiatsiyasi mini-futbol arenasida kuch sinashdilar.

3 mart kuni musobaqaning final o'yini va tantanali yopilish marosimi bo'lib o'tdi. Final musobaqasida o'z guruhida barcha raqiblarini mag'lubiyatga uchratgan Agrobank ATB va Hamkorbank ATB jamoalari kuch sinashib, ko'plab tomoshabinlar ishtirokida bo'lib o'tgan o'yinda Hamkorbank xodimlaridan tuzilgan jamoa g'alaba qozondi.

Musobaqaning tantanali yopilish marosimida so'z olgan Andijon  viloyat futbol assotsiatsiyasi birinchi vitse-prezidenti Bekzodbek Karimov hamda viloyat Markaziy bank boshqarmasi rahbari Elyorbek Usmonovlar turnirda faol ishtirok etgan jamoalarga  minnatdorchilik bildirib o'tdilar. Turli yo'nalishlarda o'zini namoyon etgan havaskor futbolchilarga alohida sovg'alar berildi.

Sovrindor jamoalar medallar va mukofotlar bilan taqdirlanib, g'olib Hamkorbank  jamoasiga viloyat Markaziy bank boshqarmasi rahbari Elyorbek Usmonov tomonidan Kubok topshirildi.