Milliy jamoamizning kechagi o'yini haqida

Kecha O'zbekiston milliy jamoasi Singapurga qarshi o'yin o'tkazar ekan ijtimoiy tarmoqda bu bosh mavzuga aylandi, balki. Tvitterda nisbatan faol bo'lganim bois uni ko'proq kuzatdim bu vaqt. O'yin vaqti va u tugagach yaqin 1-2 soatda minglab tvitlar uchrashuv atrofida yozildi, menimcha. Ular ichida ikkitasi alohida e'tiborimni tortdi.

Biridagi mazmun quyidagicha edi: tarkibimizda A seriyadagi ilk mavsumida yaxshi ko'rsatkich qayd etgan va shuning uchun bir qator Evropa jamoalarini qiziqtirishi mumkin bo'lgan Eldor Shomurodovning borligi bu boshqa futbolchilarga ham imkoniyat beradi. Eldor bois o'yinni kuzatgan skautlar, mutaxassislar shu bahonada Jaloliddin Masharipovning o'yinlarini ko'rishdi. Va menimcha kecha Jaloliddin maydondagi eng yaxshilarimizdan bo'ldi. Shu bahonada Ikrom Aliboev balki ko'plarning nigohiga tushar. Ikrom ham kecha eng yaxshi o'yinlaridan birini o'tkazdi, chog'i.

Ikkinchi tvitni matni bilan keltiraman. “Singapurning biz kabi termasi bo'lib, bizning Singapur kabi iqtisodimiz bo'lsaydi, misol uchun”.

Asli biz qanday yutishimiz kerak bo'lsa shunday yutdik, menimcha. Ishonchli, oson va chiroyli. Singapurdan kuchli ekanimiz va terma jamoa fonida tugal xulosalarni qilolmasligimiz ma'lum edi. Ko'p ehtimol Yaman bilan ham shunday bo'ladi. Haqiqiy kuchimiz esa so'nggi turda Saudiya Arabistoniga qarshi o'yinda ko'rinsa kerak.

Ha, darvoqe, kecha raqib haddan ziyod qo'pol o'ynadi. Men shu kabi o'yinni Yamandan ham kutyapman. Ehtiyot bo'lib, etakchilarni ehtiyot qilib uchinchi uchrashuvga etib olishimiz kerak.

Yigitlar, yaxshi boshladingiz. Ko'rdik. Zavq oldik. Bu o'yindan ko'pchilik quvondi! Bundan ham yaxshiroq bo'lishiga masalan men ishonaman. Keyingi o'yinlarda ham UzReport TVda birga qo'llab-quvvatlaymiz.

Orif Tolipov

Manba: t.me/tolipovuz