Joze Mourino Evro—2020ning asosiy favoriti qaysi terma jamoa ekanini aytdi

«Roma» klubi bosh murabbiyi Joze Mourino Frantsiya terma jamoasining Evro—2020dagi imkoniyatlarini baholadi.

"Jamoangizda Mbappedek futbolchi bo'lsa, g'alaba qozonmaslik mumkin emas. Kilian o'yinlarni yutadigan va raqiblarni qo'rqita oladigan futbolchilardan biri.

Mbappe barchaga Lionel Messi va Krishtianu Ronaldu ketganidan so'ng dunyoning eng yaxshi futbolchisi aynan u bo'lishini isbotlashga urinyapti.

Dide Desham nima xohlayotganini biladi. Frantsiya amaldagi Jahon chempioni. Undan tashqari 2016 yilgi Evro musobaqasi finalchisi ham. Finaldan oldingi har qanday bosqichda ishtirokini to'xtatish ular uchun muvaffaqiyatsizlik bo'ladi, deb o'ylayman. Desham nima yozilayotgani va nima aytilayotganiga e'tibor qilmaydi. Shunchaki u nima xohlayotganini biladi. Didening qat'iy printsiplari bor. Har bir futbolchi uni hurmat qilishi kerak. Agar shunday qilmasa, u tarkibda bo'lmaydi.

Futbolchilar murabbiy istagandek harakat qilsa, jamoa juda kuchli bo'ladi. Men bu jamoaning kuchsiz tomonlarini ko'rmayapman. Musobaqada g'alaba qozonishi mumkin bo'lgan jamoani ko'rsatish kerak bo'lsa, hech ikkilanmasdan Frantsiyani ko'rsatgan bo'lardim. Ularda ajoyib tarkib shakllangan.

Frantsiya Evroni yutishi kerak. Unday bo'lmasa, musobaqa omadsiz kechgan bo'ladi", — dedi Joze Mourino.