Tanishing, UEFAning yangi musobaqasi — konferentsiyalar kubogi!

Evropada yangi turnirning dastlabki o'yinlariga iyul oyidayoq start beriladi. Florentino Peres va Anelli qanchalik xohlashmasin, bu Superliga emas. Biz siz bilan Chempionlar ligasi hamda Evropa ligasidan keyin uchinchi o'rinda turuvchi, Konferentsiya Ligasi deb nomlangan UEFA tashkilotining yangi musobaqasi haqida fikr yuritamiz. Quyida, musobaqa haqida yaxshiroq tasavvur hosil qilishingiz mumkin bo'ladi.

Ushbu turnir qanday va nima uchun xizmat qiladi?

UEFA tashkiloti 2015 yildan buyon uchinchi o'rinda turuvchi evrokubok musobaqasini yaratish ustida bosh qotirayotgan edi. Bundan ko'zlangan maqsad – bu Evropada futboli endigina rivoj topayotgan mamlakatlar klublarini ham xalqaro maydonda o'zlarini sinab ko'rishiga imkoniyat yaratish. Qolaversa, Evropa ligasi dastlabki saralash bosqichidayoq mag'lubiyatga uchragan jamoalarga ushbu turnir ayni muddao bo'ladi.

Grand klublardan qaysilari ushbu turnirda qatnashadi?

Deyarli hech bir top-klub qatnashmaydi. Katta beshlik chempionatlaridan bittagacha klubda qatnashish imkoniyati mavjud. Masalan, Angliyada liga kubogiga sazovor bo'lgan jamoa ushbu turnir qatnashchisi bo'lishi mumkin. Ispaniya, Italiya, Germaniya va Frantsiyada esa qoidaga muvofiq, beshinchi va ettinchi o'rinlarni egallagan klublar orasida Evropa ligasiga yo'llanma olganlarining pastida joylashgan jamoalar bo'lishadi.

Mana, hozirgi top-5 chempionatlarda Konferentsiya ligasiga quyidagi beshta: «Tottenhem», «Lans», «Roma», «Vilyarreal» va "Union Berlin" klublari qatnashish imkoniyatiga ega bo'lishgan.

Shuningdek, ushbu musobaqani EChL va Evropa ligasi saralashlarida mag'lub bo'lganlar bilan to'ldirish o'rinli bo'ladi.

Ya'ni nazariy jihatdan «Fenerbaxche», «Reynjers» va «Olimpiakos» kabi jamoalar keyinchalik Konferentsiyalar ligasida qatnashishi mumkin. Albatta, ushbu jamoalarni hozirgi holatini gigantlar bilan solishtirish mushkul ish.

Turnir qaysi formatda tashkil qilinadi?

Boshqa evrokuboklarda bo'lgani kabi: to'rtta saralash bosqichi, 32 ta klubdan iborat guruh va pley-offdan iborat bo'ladi.

Bu erda tavofut yuzaga kelgan. Ya'ni ushbu musobaqada ikkita 1/8 final bo'lib o'tadi. Dastabkisida, guruhda ikkinchi o'rinni egallagan sakkizta jamoa, Evropa ligasi guruhlarida uchinchi o'rinni egallagan boshqa sakkiztalik bilan o'zaro bahslashishadi. So'ngra, ushbu juftliklarning g'oliblari, Konferentsiya ligasi guruhida birinchi o'rinni egallagan klublar bilan to'liq 1/8 finalda to'qnash keladi. Keyin hammasi odatiy tusda bo'ladi. G'olib klublar keyingi yili Albaniya poytaxtida o'tkazilajak ikkita chorak, ikkita yarim va final bahslarida qatnashadilar.

Musobaqa klublarga yana bir imtiyoz taqdim etadi: turnir g'olibi keyingi yilgi Evropa ligasi guruh bosqichida qatnashishi kafolatlanadi.

Qanday mukofotlar belgilangan?

Bu haqda rasmiy ma'lumot hozircha mavjud emas. Lekin mukofot qiymati ko'pi bilan Evropa ligasidagi darajada bo'ladi. O'tgan mavsum u erdagi pul sovrinari quyidagicha edi:

Guruhdagi ishtirok uchun — 2,9 mln evro;

Guruhdagi g'alaba uchun — 0.57 mln evro;

Guruhdagi durang uchun — 0.19 mln evro;

Guruhdagi birinchi o'rin uchun — 1 mln evro;

Guruhdagi ikkinchi o'rin uchun — 0,5 mln evro;

1/16 finalga chiqish — 0,5 mln evro;

1/8 finalga chiqish — 1,1 mln evro;

1/4 finalga chiqish — 1,5 mln evro;

1/2 finalga chiqish — 2,4 mln evro;

Finaldagi mag'lubiyat — 4,5 mln evro;

Finaldagi g'alaba — 8,5 mln evro.

Kelayotgan mavsumda bizni yana bir ajoyib turnir kutmoqda. Umid qilamizki, musobaqaning debyuti muvaffaqiyatli bo'ladi.

Jaloliddin ISMATOV tayyorladi.