Murod Bobojonov: «Muxlislardan uzr so'rayman, lekin ularning ba'zilariga ham o'z fikrim bor!»

"Surxon"  - "Turon" (1:0) uchrashuvidan so'ng, "Surxon" futbol klubi norasmiy fan klub kanalida "Murod Bobojonovning muxlislardan uzr so'rashini xohlaymiz" qabilida post qoldirilgan. Ushbu vaziyatga oydinlik kirtish maqsadida futbolchi bilan bog'lanib, vaziyatga oydinlik kiritdik.

"Avvalo g'alaba bilan barcha muxlislarimizni tabriklayman. Ochig'i, o'yin yakunlangach, norasmiy fan klub kanalidagi postni o'qib, hayron qoldim. O'zimga-o'zim savol berdim qaysi harakatim uchun uzr so'rashim kerak? Maydonda borimizni berib, faqat g'alaba uchun maydonga tushyapmiz. Imkon qadar golli vaziyatlar yaratishga harakat qilayapmiz.

Lekin, shuni ta'kidlashim joiz, maydonda harakat qilayotganimda jamoamiz muxlislari bizga muxlislik qilib, dalda berish o'rniga aksincha turli xil haqoratli so'zlar bilan "siylashadi". Undan tashqari, raqib jamoaga muxlislik qilayotganlarini ham eshitib qolaman. Bu bizga salbiy ta'sir o'tkazmoqda.

Muxlislardan uzr so'rayman. O'z navbatida muxlislardan har bir bahsda har bir futbolchiga dalda berishlarini va 12-o'yinchi bo'lishlarini so'raymiz. Ularning qo'llab-quvvatlashi bizga qo'shimcha kuch beradi", — dedi Murod Bobojonov.